ប្រទេសន័រវែសកាលពីថ្ងៃពុធ បានច្រានចោលការធ្វើជាអ្នកធានាតែមួយគត់នៃប្រាក់កម្ចីរបស់សហភាពអឺរ៉ុប(EU)ដល់អ៊ុយក្រែន ដោយប្រើប្រាស់ទ្រព្យសម្បត្តិរបស់រុស្ស៊ីដែលត្រូវបានបង្កក ប៉ុន្តែអាចចូលរួមចំណែក អាស្រ័យលើដំណោះស្រាយដែលទីក្រុងប្រ៊ុចសែលជ្រើសរើស។

គណៈកម្មការអឺរ៉ុប កំពុងពិចារណាប្រើប្រាស់ទ្រព្យសម្បត្តិមួយផ្នែករបស់រុស្ស៊ីដែលត្រូវបានបង្កក បន្ទាប់ពីការឈ្លានពានអ៊ុយក្រែនរបស់ខ្លួន ដើម្បីផ្តល់ប្រាក់កម្ចីគ្មានការប្រាក់ចំនួន ១៤០ ពាន់លានអឺរ៉ូ (១៦២ ពាន់លានដុល្លារ) ដល់ទីក្រុងគីវ ដើម្បីផ្តល់ហិរញ្ញប្បទានដល់ការគាំទ្រផ្នែកថវិកា និងយោធារបស់ខ្លួន ក្នុងរយៈពេល ពីរឆ្នាំ ខាងមុខ។

ប៉ុន្តែផែនការនេះ បានប្រឈមនឹងការជំទាស់ពីប្រទេសបែលហ្ស៊ិក ដែលជាទីតាំងរបស់អង្គការទទួលប្រាក់បញ្ញើអន្តរជាតិ Euroclear ដែលកាន់កាប់ទ្រព្យសម្បត្តិភាគច្រើនដែលត្រូវបានបង្កក ស្របពេលមានការភ័យខ្លាចចំពោះឥទ្ធិពលរបស់រុស្ស៊ី។

ដោយបានលើកឡើងថា ប្រទេសន័រវេស ដែលជាប្រទេសផលិតប្រេង និងឧស្ម័នធំជាងគេនៅអឺរ៉ុបខាងលិច បានរកចំណូលបន្ថែមចំនួន ១០៩ ពាន់លានអឺរ៉ូពីតម្លៃឧស្ម័ន ដែលកើនឡើង បន្ទាប់ពីការឈ្លានពានរបស់រុស្ស៊ី សេដ្ឋវិទូន័រវែស ពីរនាក់ បានផ្តល់យោបល់ថា ប្រទេសរបស់ពួកគេ គួរតែចូលរួមចំណែកជាអ្នកធានាសម្រាប់ប្រាក់កម្ចីនេះ ទោះបីជាខ្លួនមិនមែនជាសមាជិកសហភាពអឺរ៉ុបក៏ដោយ៕