យោងតាមអតីតមន្ត្រីអាមេរិកពីររូបដែលដឹងពីបញ្ហានេះ បានប្រាប់សារព័ត៌មានរ៉យទ័រថា សហរដ្ឋអាមេរិក ប្រមូលបានចារកម្មសម្ងាត់កាលឆ្នាំ២០២៤ ពីក្រុមមន្ត្រីអ៊ីស្រាអែល ដែលបានពិភាក្សាគ្នាថា ទាហានអ៊ីស្រាអែលបានបញ្ជូនជនជាតិប៉ាឡេស្ទីនឱ្យចូលទៅក្នុងផ្លូវរូងក្រោមដីហ្កាហ្សា ដែលអ៊ីស្រាអែលជឿថាអាចមានគ្រឿងផ្ទុះ។

ប្រភពទាំងនេះនិយាយថា ដំណឹងសម្ងាត់នេះត្រូវបានចែករំលែកជាមួយសេតវិមាន និងវិភាគដោយសហគមន៍ចារកម្ម នៅក្នុងសប្តាហ៍ចុងក្រោយនៃរដ្ឋបាលរបស់អតីតប្រធានាធិបតីអាមេរិក Joe Biden ។ គួរបញ្ជាក់ថា ច្បាប់អន្តរជាតិ ហាមឃាត់ការប្រើប្រាស់ជនស៊ីវិលធ្វើជាខែលការពារខ្លួនបែបនេះ កំឡុងពេលធ្វើសកម្មភាពយោធា។

ក្រុមមន្ត្រីក្នុងរដ្ឋបាលលោក Biden ធ្លាប់លើកឡើងពីក្ដីបារម្ភជាយូរមកហើយ អំពីរបាយការណ៍ព័ត៌មានដែលបង្ហាញថា ទាហានអ៊ីស្រាអែល ប្រើជនជាតិប៉ាឡេស្ទីនដើម្បីជាខែលការពារខ្លួនក្នុងតំបន់ហ្កាហ្សា។ យ៉ាងណាមិញ ប្រភពមិនបានបញ្ជាក់ឡើយថា តើជនជាតិប៉ាឡេស្ទីនដែលចារកម្មសម្ងាត់បាននិយាយនោះ គឺជាអ្នកទោស ឬជនស៊ីវិលនោះទេ។

នៅក្នុងសេចក្តីថ្លែងការណ៍មួយ កងកម្លាំងការពារអ៊ីស្រាអែល IDF បាននិយាយថា ខ្លួន "ហាមឃាត់ការប្រើជនស៊ីវិលជាខែល ឬបង្ខិតបង្ខំពួកគេក្នុងគ្រប់មធ្យោបាយ ដើម្បីចូលរួមក្នុងប្រតិបត្តិការយោធា"។ សេចក្តីថ្លែងការណ៍សង្កត់ធ្ងន់ថា មន្ទីរស៊ើបអង្កេតឧក្រិដ្ឋកម្មរបស់នគរបាលយោធា កំពុងស៊ើបអង្កេត "ការសង្ស័យពាក់ព័ន្ធនឹងជនជាតិប៉ាឡេស្ទីនក្នុងបេសកកម្មយោធា" បែបនេះ៕