ទីភ្នាក់ងារថាមពលអន្តរជាតិ IEA បាននិយាយកាលពីថ្ងៃពុធ (១២ វិច្ឆិកា) ថា តម្រូវការប្រេង និងឧស្ម័នសកល អាចបន្តកើនឡើងរហូតដល់ឆ្នាំ២០៥០ ដោយងាកចេញពីការរំពឹងទុកពីមុននៃការផ្លាស់ប្តូរយ៉ាងលឿនទៅប្រើឥន្ធនៈថាមពលស្អាត បន្ទាប់ពីការរិះគន់របស់សហរដ្ឋអាមេរិក ចំពោះការផ្តោតផ្នែកអាកាសធាតុរបស់ខ្លួន។

អង្គការឃ្លាំមើលសន្តិសុខថាមពល ដែលមានមូលដ្ឋាននៅទីក្រុងប៉ារីសមួយនេះ ក៏បានព្យាករនៅក្នុងចក្ខុវិស័យប្រចាំឆ្នាំរបស់ខ្លួនថា ពិភពលោកទំនងជានឹងបរាជ័យក្នុងការបំពេញគោលដៅនៃការកាត់បន្ថយកំណើនសីតុណ្ហភាព ឱ្យជិតបំផុតតាមដែលអាចធ្វើទៅបាននៃកម្រិត ១,៥អង្សាសេ លើសពីសម័យមុនឧស្សាហ៍កម្ម ដើម្បីបញ្ចៀសផលប៉ះពាល់ដ៏មហន្តរាយបំផុតនៃបម្រែបម្រួលអាកាសធាតុ។

ទីភ្នាក់ងារ IEA នេះស្ថិតនៅក្រោមសម្ពាធពីសហរដ្ឋអាមេរិក ដោយសារតែការផ្លាស់ប្តូររបស់ខ្លួនក្នុងប៉ុន្មានឆ្នាំថ្មីៗនេះ ឆ្ពោះទៅរកការផ្តោតលើគោលនយោបាយថាមពលស្អាត ខណៈលោកប្រធានាធិបតី Donald Trump បានអំពាវនាវដល់ក្រុមហ៊ុនអាមេរិក ឱ្យពង្រីកផលិតកម្មប្រេង និងឧស្ម័នបន្ថែមទៀត។

នៅក្នុងចក្ខុវិស័យថាមពលពិភពលោករបស់ខ្លួន ដែលចេញផ្សាយកាលពីថ្ងៃពុធ ទីភ្នាក់ងារ IEA បានព្យាករថា "នៅក្រោមសេណារីយ៉ូគោលនយោបាយបច្ចុប្បន្ន" តម្រូវការប្រេងនឹងកើនឡើងដល់ ១១៣លានបារ៉ែលក្នុងមួយថ្ងៃ នៅពាក់កណ្តាលសតវត្សរ៍នេះ (ពោលគឺឆ្នាំ២០៥០) ដោយកើនឡើងប្រហែល ១៣% ពីការប្រើប្រាស់ឆ្នាំ២០២៤កន្លងទៅ៕