នៅជម្រករបស់អង្គការជំនួយ CRARN សិស្សវ័យ ១៣ឆ្នាំម្នាក់ បានរំឭកដល់បទពិសោធន៍ដ៏គួររន្ធត់របស់ខ្លួន ។ នៅវ័យ ៩ឆ្នាំ ម្តាយរបស់ក្មេងប្រុស បាននាំរូបគេទៅកាន់កម្ពោតព្រៃ ហើយនិងបានវាយប្រហាររូបគេនឹងពូថៅ ធ្វើឲ្យក្មេងប្រុសរងរបួសក. ស្មា និងខ្នង ហើយបន្ទាប់មកយកស្មៅគ្របពីលើរូបគេ និងទុកឲ្យរូបគេស្លាប់ ។ ក្មេងប្រុសម្នាក់នេះ ត្រូវបានចោទប្រកាន់ថាចេះអំពើអាបធ្មប់ដោយគ្រូគង្វាលម្នាក់ នៅព្រះវិហារក្នុងស្រុក ។

ក្មេងប្រុសម្នាក់នេះ និយាយទាំងទឹកភ្នែកថា ខ្ញុំនៅក្នុងកម្ពោតព្រៃរយៈពេល ៣ថ្ងៃ ។ ខ្ញុំមិនអាចដើរបាននោះទេ ខ្ញុំប្រើជង្គង់របស់ខ្ញុំដើម្បីលូនដល់ផ្លូវ ។

អ្នកដើរឆ្លងកាត់ម្នាក់ បានប្រទះឃើញក្មេងប្រុស ឲ្យនំបុ័ងក្មេងប្រុសបរិភោគ និងនាំក្មេងប្រុសទៅកាន់មន្ទីរពេទ្យ ។ ក្រោយព្យាបាលរួច ក្មេងប្រុសម្នាក់នេះ ត្រូវបាននាំទៅកាន់មជ្ឈមណ្ឌលស្តារនីតិសម្បទា ជាទីដែលក្មេងប្រុសរស់នៅបច្ចុប្បន្ន ហើយនិងបានចូលរៀន ។ ក្មេងប្រុស ចង់ក្លាយជាមេធាវី ដើម្បីឲ្យរូបគេអាចប្តឹងម្តាយរបស់ខ្លួនវិញ ។

ក្មេងប្រុសមិនមែនត្រឹមតែជាជនរងគ្រោះម្នាក់ប៉ុណ្ណោះទេ ។ ក្មេងស្រី Faith គឺជាអ្នករស់រានម្នាក់ទៀត បានប្រឈមការចោទប្រកាន់ស្រដៀងគ្នា ។ ក្មេងស្រី Faith រត់គេចចេញពីផ្ទះរបស់នាងនៅរដ្ឋ Akwa Ibom ក្រោយពុំបានទទួលអាហារអស់រយៈពេលជាច្រើនថ្ងៃ ។ នាងត្រូវបានចោទប្រកាន់ដោយម្តាយមីងរបស់នាង នៅវ័យ ១៣ឆ្នាំ ថាជាមេធ្មប់ ធ្វើឲ្យគ្រួសាររបស់គាត់គ្មានសំណាង ។

បច្ចុប្បន្នក្នុងវ័យ ១៩ឆ្នាំ នាង Faith បានសិក្សាផ្នែកបច្ចេកវិទ្យាមន្ទីរពិសោធន៍វិទ្យាសាស្ត្រនៅសាលាពហុបច្ចេកទេស ស្ថិតក្នុងទីក្រុង Eket នៅរដ្ឋ Akwa Ibom ហើយនាងមានមហិច្ឆិតាចង់ក្លាយជាវេជ្ជបណ្ឌិត ។ ការផ្លាស់ប្តូរជោគវាសនារបស់នាង Faith បានកើតមាន ក្រោយដើរចម្ងាយ ២០គ.ម ដោយគ្មានអាហារទទួលទាន នាងជ្រកកោននៅក្នុងជម្រកគ្រប់គ្រងដោយអង្គការ CRARN ដែលជាក្រុមជំនួយជួយក្មេងៗរងការចោទប្រកាន់ថាចេះអំពើអាបធ្មប់ ។

ក្មេងស្រី Faith ស្ថិតនៅក្នុងចំណោមក្មេងស្រីប្រហែល ២០០នាក់ ដែលត្រូវបានគេចោទប្រកាន់ថាចេះអំពើអាបធ្មប់កាលនៅក្មេង ហើយត្រូវបានជួយសង្រ្គោះដោយក្រុម CRARN ដើម្បីទទួលបានការសិក្សាថ្នាក់ខ្ពស់ចាប់តាំងពីឆ្នាំ ២០០៣រហូតមក ។

អង្គការ CRARN ដែលមានន័យពេញថា អង្គការបណ្តាញសិទ្ធិកុមារ និងស្តារនីតិសម្បទា បានប៉ាន់ប្រមាណថា ក្មេងៗនីហ្សេរីយ៉ាជាង ៣ម៉ឺននាក់ ប្រឈមនឹងការចោទប្រកាន់ថាចេះអំពើអាបធ្មប់ ក្នុងរយៈពេលជាង ២ទសវត្សរ៍កន្លងមកនេះ ៕