អ៊ុយក្រែន៖ សារព័ត៌មាន BBC បានដកស្រង់សម្ដីរបស់ឯកអគ្គរដ្ឋទូតរបស់ប្រទេសអ៊ុយក្រែន ប្រចាំនៅចក្រភពអង់គ្លេសដោយនិយាយថា ប្រទេសអ៊ុយក្រែនអាចនឹងដកខ្លួនពីការចូលជាសមាជិកអង្គការ NATO ដើម្បីបញ្ចៀសសង្គ្រាមជាមួយរុស្ស៊ី ជាអ្វីដែលនឹងក្លាយជាសម្បទានដ៏ធំដល់ក្រុងមូស្គូ ឆ្លើយតបទៅនឹងការបង្កើនកម្លាំងកងទ័ពរបស់រុស្ស៊ីនៅជាប់ព្រំដែនរបស់ខ្លួន។
ឯកអគ្គរដ្ឋទូតរបស់ប្រទេសអ៊ុយក្រែនលោក Vadym Prystaiko បានប្រាប់សារព័ត៌មាន BBC ថា អ៊ុយក្រែននឹងបត់បែនជុំវិញគោលដៅរបស់ខ្លួន ក្នុងការចូលរួមជាមួយសម្ព័ន្ធយោធាអាត្លង់ទិក នេះជាសកម្មភាពដែលប្រធានាធិបតីរុស្ស៊ីលោក Vladimir Putin បាននិយាយថា នឹងបង្កឲ្យផ្ទុះសង្គ្រាម។ នៅពេលត្រូវបានសួរថា តើទីក្រុងគៀវ (Kyiv) អាចនឹងផ្លាស់ប្ដូរជំហររបស់ខ្លួនទេលើសមាជិកភាពអង្គការ NATO សារព័ត៌មានខាងលើបានដកស្រង់សម្ដីរបស់លោកដោយនិយាយថា យើងអាច ជាពិសេសនៅពេលរងការគំរាម និងការបង្ខិតបង្ខំបែបនេះ ដែលជាកត្តារុញច្រានទៅរកការសម្រេចចិត្តបែបនេះ។
ប្រទេសអ៊ុយក្រែនមិនមែនជាសមាជិកអង្គការ NATO ទេ ប៉ុន្តែបានសន្យាកាលពីឆ្នាំ២០០៨ ថា អង្គការនេះនឹងផ្ដល់ឱកាសឲ្យអ៊ុយក្រែនចូលជាសមាជិក ជាជំហានមួយដែលនឹងនាំសម្ព័ន្ធយោធាដឹកនាំដោយសហរដ្ឋអាមេរិកមួយនេះ ចូលទៅកាន់ព្រំដែនរបស់រុស្ស៊ី៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
