គ្រូបង្រៀនសាលារៀនរដ្ឋរាប់ពាន់នាក់នៅទូទាំងប្រទេសប៉េរូ បានធ្វើកូដកម្មរយៈពេល២៤ម៉ោងកាលពីថ្ងៃព្រហស្បតិ៍ ទី១៣ ខែវិច្ឆិកា ដោយទាមទារប្រាក់បៀវត្សរ៍ខ្ពស់ជាងនេះ បង្កើនមូលនិធិសម្រាប់ការសិក្សាអប់រំ និងការធ្វើឲ្យប្រសើរលក្ខខណ្ឌការងារ ខណៈភាពតានតឹងរវាងរដ្ឋាភិបាលនិងអ្នកអប់រំ កើនឡើងដោយសារតែការប្តេជ្ញាចិត្តពុំត្រូវបានបំពេញ។

ការតវ៉ា ដែលត្រូវបានរៀបចំដោយសហជីពគ្រូបង្រៀន Sutep បាននាំមកការដើរដង្ហែក្បួន និងបាតុកម្មជាច្រើនទៅកាន់ទីក្រុងធំៗនៅទូទាំងប្រទេស។ មេដឹកនាំសហជីព បាននិយាយថាវេទិកា ១០ចំណុចរបស់ពួកគេ រួមមាន ការបង្កើនថវិកាអប់រំដល់ ៦% នៃផលិតផលក្នុងស្រុកសរុប(GDP) ការបើកប្រាក់ខែពេញលេញនៃប្រាក់រង្វាន់សាលារៀនឆ្នាំ២០២៥ និងសមភាពប្រាក់បៀវត្សរ៍សម្រាប់គ្រូបង្រៀន និងជំនួយការ។

កូដកម្មនេះ ធ្វើឡើងក្នុងពេលមានរលកនៃការមិនពេញចិត្តកាន់តែខ្លាំងនៅក្នុងវិស័យអប់រំ ដោយសាស្ត្រាចារ្យសាកលវិទ្យាល័យ បានបន្តធ្វើកូដកម្មមិនកំណត់ពេលដែលបានចាប់ផ្តើមកាលពីដើមខែនេះ ជុំវិញការទាមទារប្រាក់ខែ និងប្រាក់សោធននិវត្តន៍។ សហជីព Sutep បានព្រមានថា សកម្មភាពបន្ថែមទៀតអាចនឹងកើតឡើង ប្រសិនបើរដ្ឋាភិបាលបរាជ័យក្នុងការដោះស្រាយនូវអ្វីដែលខ្លួនហៅថា ការធ្វេសប្រហែសជាច្រើនទសវត្សរ៍មកហើយ និងការមិនធ្វើតាមការសន្យា ដែលធ្វើឲ្យប៉ះពាល់ដល់បុគ្គលិកផ្នែកអប់រំជាង៤០០.០០នាក់។