ទីភ្នាក់ងារអង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) ដែលលែងទទួលបានថវិកាពីសហរដ្ឋអាមេរិក កាលពីថ្ងៃព្រហស្បតិ៍ បានស្នើសុំថវិកាបន្ថែមពីប្រទេសផ្តល់ជំនួយផ្សេងទៀត ដោយព្រមានថា ប្រតិបត្តិការរបស់ខ្លួន អាចនឹងរងផលប៉ះពាល់ បើគ្មានចំណូលសាច់ប្រាក់។

ប្រធានទីភ្នាក់ងារ លោក Philippe Lazzarini  បានប្រាប់សន្និសីទសារព័ត៌មានមួយថា៖«យើងដំណើរការរៀងរាល់សប្តាហ៍ រៀងរាល់ខែ។ ខ្ញុំដឹងថា គិតត្រឹមថ្ងៃនេះ យើងនឹងអាចដំណើរការប្រាក់ខែរបស់យើង នៅក្នុងខែវិច្ឆិកា ប៉ុន្តែមិនដឹងថាតើយើងនឹងអាចដំណើរការប្រាក់ខែរបស់យើង នៅក្នុងខែធ្នូឬអត់នោះទេ»។

អ៊ីស្រាអែលបានហាមឃាត់ UNRWA មិនឲ្យធ្វើប្រតិបត្តិការនៅលើទឹកដីរបស់ខ្លួន បន្ទាប់ពីចោទប្រកាន់បុគ្គលិកមួយចំនួនរបស់ខ្លួនថា បានចូលរួមក្នុងការវាយប្រហារនៅថ្ងៃទី ០៧ ខែតុលា ឆ្នាំ ២០២៣ ដោយក្រុមហាម៉ាស ដែលបានបង្កឲ្យមានជម្លោះបង្ហូរឈាម នៅតំបន់ហ្កាហ្សា។

បន្ទាប់ពីការចោទប្រកាន់ទាំងនោះ សហរដ្ឋអាមេរិក ដែលជាអ្នកផ្តល់ជំនួយដ៏ធំបំផុតរបស់ទីភ្នាក់ងារនេះ បានផ្អាកការគាំទ្ររបស់ខ្លួន ជាប្រវត្តិសាស្ត្រ ។

បន្ទាប់ពីការសម្រេចចិត្តរបស់អ៊ីស្រាអែល UNRWA ត្រូវបានបង្ខំឲ្យធ្វើមាតុភូមិនិវត្តន៍បុគ្គលិកអន្តរជាតិរបស់ខ្លួនពីតំបន់ហ្កាហ្សា និងតំបន់វេសបែង ដោយកំណត់សមត្ថភាពចែកចាយជំនួយស្បៀងអាហារ  របស់ខ្លួន៕