យោងតាមការអះអាងរបស់ក្រុមក្រុមអ្នកជំនាញវេជ្ជសាស្រ្តអាហ្វ្រិក បានឲ្យដឹងថា អាហ្វ្រិកកំពុងឆ្លងកាត់ការរីករាលដាលឆ្លងជំងឺអាសន្នរោគដ៏អាក្រក់បំផុត ក្នុងរយៈពេល ២៥ឆ្នាំកន្លងមកនេះ ក្នុងនោះប្រទេសអង់ហ្គោឡា និងប្រទេសប៊ូរុនឌី មើលឃើញការហក់ឡើងខ្ពស់ករណីឆ្លងថ្មី ដែលនេះបង្ហាញពីការចម្លងដ៏សកម្មនៃជំងឺមួយនេះ ។

កាលពីថ្ងៃព្រហស្បតិ៍ម្សិលមិញ មន្ទីរគ្រប់គ្រង និងបង្ការជំងឺអាហ្វ្រិក(CDC) ដែលជាទីភ្នាក់ងារសុខភាពសាធារណៈសម្រាប់សហភាពអាហ្វ្រិកនិយាយថា ពួកគេបានរកឃើញករណីឆ្លង និងករណីសង្ស័យជំងឺអាសន្នរោគចំនួន ៣០ម៉ឺននាក់ មកទល់នឹងពេលនេះក្នុងឆ្នាំ ២០២៥នេះ ។ ជាងនេះទៅទៀត ពួកគេបានកត់ត្រាករណីស្លាប់មនុស្សចំនួនជាង ៧ពាន់នាក់ ។

តួលេខនេះ បង្ហាញពីកំណើនជាង ៣០ភាគរយនៃចំនួនសរុបដែលបានរកឃើញកាលពីឆ្នាំមុនដែលមានចំនួនត្រឹម ២៥៤.០៧៥ករណីប៉ុណ្ណោះ ។

លោក Jean Kaseya គឺជាអគ្គនាយក CDC និយាយនៅក្នុងសន្និសីទសារព័ត៌មានថា ជំងឺអាសន្នរោគនៅតែជាបញ្ហាធំ ។ ជារៀងរាល់ឆ្នាំ ពួកយើងតែងតែមើលឃើញករណីឆ្លងកើនឡើងខ្លាំងឥតឈប់ឈរ ។

លោក Kaseya និយាយប្រាប់ក្រុមអ្នកសារព័ត៌មានថា ជាពិសេសប្រទេស ២ គឺប្រទេសអង់ហ្គោឡា និងប្រទេសប៊ូរុនឌី មើលឃើញការហក់ឡើងខ្ពស់ករណីឆ្លងថ្មី ដែលបង្ហាញពីការចម្លងដ៏សកម្មនៃជំងឺមួយនេះ ។

ប្រទេសអង់ហ្គោឡា បានមើលឃើញករណីឆ្លងសរុបជំងឺអាសន្នរោគចំនួន ៣៣.៥៦៣នាក់ មកទល់នឹងពេលនេះ ក្នុងឆ្នាំ ២០២៥ ក្នុងនោះករណីស្លាប់មានចំនួន ៩៦៦នាក់ ហើយប្រទេសប៊ូរុនឌី បានរកឃើញករណីឆ្លងយ៉ាងហោច ២.៣៨០នាក់ និងករណីស្លាប់មនុស្ស ១០នាក់ ។

សូមបញ្ជាក់ថា ជំងឺអាសន្នរោគ គឺជាជំងឺបាក់តេរីដែលតាមធម្មតារីករាលដាលឆ្លងនៅពេលមនុស្សទទួលទានទឹកកខ្វក់ ឬប៉ះពាល់ទឹកទាំងមានដំបៅ ៕