រដ្ឋមន្ត្រីការពារជាតិមកពីប្រទេសធំៗចំនួនប្រាំរបស់ណាតូនៅអឺរ៉ុប កាលពីថ្ងៃសុក្រ ទី១៤ ខែវិច្ឆិកា បានសន្យាកិច្ចសហប្រតិបត្តិការកាន់តែខ្លាំង ដើម្បីប្រឆាំងនឹងការលុកលុយដោយយានដ្រូន និង «ការគំរាមកំហែងកូនកាត់» ផ្សេងៗទៀត រួមទាំងការវាយប្រហារតាមអ៊ីនធឺណិត និងព័ត៌មានក្លែងក្លាយ បន្ទាប់ពីកិច្ចពិភាក្សានៅក្នុងរដ្ឋធានីរបស់ប្រទេសអាល្លឺម៉ង់។

ប្រទេសអាល្លឺម៉ង់ បារាំង អ៊ីតាលី ប៉ូឡូញ និងចក្រភពអង់គ្លេស បានបញ្ជាក់ជាថ្មីនូវ «ការគាំទ្រឥតងាករេ» របស់ខ្លួនសម្រាប់ប្រទេសអ៊ុយក្រែនក្នុងសង្រ្គាមរបស់ប្រទេសនេះជាមួយរុស្ស៊ី និងបានសង្កត់ធ្ងន់លើតម្រូវការក្នុងការពង្រឹងកងកម្លាំងប្រដាប់អាវុធរបស់ពួកគេ។

នៅក្នុងសេចក្តីថ្លែងការណ៍រួម ក្រុមរដ្ឋមន្ត្រីបាននិយាយថានឹងបង្កើនការសម្របសម្រួលដើម្បីទប់ទល់ការគំរាមកំហែងកូនកាត់ «ប្រឆាំងសម្ព័ន្ធមិត្ត» រួមទាំងការធ្វើឲ្យប្រសើរការការពារយានដ្រូន និងបង្កើនការចែករំលែកព័ត៌មានក្នុងចំណោមដៃគូសហភាពអឺរ៉ុប។ ប្រទេសជាច្រើននៅអឺរ៉ុប បានចោទប្រកាន់រុស្ស៊ីថាបានអនុវត្តប្រតិបត្តិការកូនកាត់ ដូចជាយុទ្ធនាការបំផ្លិចបំផ្លាញ និងព័ត៌មានក្លែងក្លាយ។ អាកាសយានដ្ឋាន និងទីតាំងយោធាដ៏រសើបនៅក្នុងប្រទេសបែលហ្ស៊ិក ដាណឺម៉ាក អាល្លឺម៉ង់ ន័រវេស និងប្រទេសប៉ូឡូញ កាលពីពេលថ្មីៗនេះបានរាយការណ៍ពីសកម្មភាពយានដ្រូនដែលមិនអាចពន្យល់បាន។ រដ្ឋមន្ត្រីការពារជាតិអាល្លឺម៉ង់លោក Boris Pistorius បាននិយាយថាឧបទ្ទវហេតុបែបនេះគឺមានបំណងបង្វែរអារម្មណ៍ពីបញ្ហាផ្ទៃក្នុងរបស់រុស្ស៊ី។ ក្រុមរដ្ឋមន្ត្រី ដែលបានចូលរួមដោយប្រធានគោលនយោបាយការបរទេសរបស់សហភាពអឺរ៉ុប លោកស្រី Kaja Kallas ក៏បានប្តេជ្ញារក្សាជំនួយយោធាដល់អ៊ុយក្រែន និងធ្វើឱ្យកិច្ចសហប្រតិបត្តិការឧស្សាហកម្មកាន់តែស៊ីជម្រៅ ហើយការរួមបញ្ចូលឧស្សាហកម្មការពារជាតិរបស់អ៊ុយក្រែនទៅក្នុងខ្សែច្រវ៉ាក់ផ្គត់ផ្គង់អឺរ៉ុបនឹងក្លាយជាអាទិភាពមួយ។