លោកនាយករដ្ឋមន្ត្រី Benjamin Netanyahu បាននិយាយកាលពីថ្ងៃអាទិត្យ១៦វិច្ឆិកា ថា អ៊ីស្រាអែលនៅតែប្រឆាំងនឹងរដ្ឋប៉ាឡេស្ទីន បន្ទាប់ពីការតវ៉ាដោយក្រុមសម្ព័ន្ធមិត្តស្តាំនិយមជ្រុលលើសេចក្តីថ្លែងការណ៍គាំទ្រដោយសហរដ្ឋអាមេរិក ដែលបង្ហាញពីការគាំទ្រចំពោះមាគ៌ាឆ្ពោះទៅរកឯករាជ្យភាពប៉ាឡេស្ទីន។  

លោក Netanyahu បាននិយាយពីរថ្ងៃ បន្ទាប់ពីសម្ព័ន្ធមិត្តសំខាន់របស់អ៊ីស្រាអែល គឺសហរដ្ឋអាមេរិក និងប្រទេសមូស្លីមភាគច្រើន បានគាំទ្រសេចក្តីព្រាងសេចក្តីសម្រេចរបស់អង្គការសហប្រជាជាតិ ដែលគាំទ្រផែនការសន្តិភាពហ្កាហ្សារបស់ប្រធានាធិបតីលោក Donald Trump ដោយនិយាយថា ដំណើរការនេះបានបើកផ្លូវទៅកាន់រដ្ឋប៉ាឡេស្ទីន។

ក្រុមប្រឹក្សាសន្តិសុខអង្គការសហប្រជាជាតិដែលមានសមាជិក ១៥ រូប បានចាប់ផ្តើមការចរចាកាលពីថ្ងៃទី ៧ ខែវិច្ឆិកា លើសេចក្តីព្រាងនេះ ដែលនឹងផ្ដល់អាណត្តិដល់សំណើរបស់លោក Trump សម្រាប់រដ្ឋបាលអន្តរកាល "ក្រុមប្រឹក្សាសន្តិភាព" នៅក្នុងតំបន់ហ្កាហ្សា ដើម្បីដោះស្រាយបញ្ហានានា រួមទាំងការកសាងឡើងវិញក្រោយសង្គ្រាម និងការស្តារសេដ្ឋកិច្ចឡើងវិញ។

ផែនការ ២០ ចំណុចរបស់លោក Trump រួមមានឃ្លាមួយដែលនិយាយថា ប្រសិនបើមានកំណែទម្រង់នៅក្នុងអាជ្ញាធរប៉ាឡេស្ទីន "លក្ខខណ្ឌនានាអាចនឹងមានសម្រាប់មាគ៌ាដ៏គួរឱ្យទុកចិត្តមួយឆ្ពោះទៅរកការប្ដេជ្ញាចិត្តដោយខ្លួនឯង និងរដ្ឋប៉ាឡេស្ទីន ដែលពួកលោកទទួលស្គាល់ថាជាសេចក្តីប្រាថ្នារបស់ប្រជាជនប៉ាឡេស្ទីន"។

នៅពេលចាប់ផ្ដើមកិច្ចប្រជុំគណៈរដ្ឋមន្ត្រីកាលពីថ្ងៃអាទិត្យ ក្នុងទីក្រុង Jerusalem លោក Netanyahu ក៏បានសំដៅដល់ក្រុមហាម៉ាស ផងដែរ  ដោយនិយាយថា ក្រុមសកម្មប្រយុទ្ធប៉ាឡេស្ទីនមួយនេះ នឹងត្រូវតែរំសាយអាវុធ ទោះតាមវិធីងាយស្រួល ឬលំបាកក៏ដោយ៕