អតីតនាយករដ្ឋមន្ត្រីអ៊ុយក្រែន (ក្នុងឆ្នាំ ២០១០-២០១៤) លោក Nikolay Azarov បានប្រាប់សារព័ត៌មាន TASSថា សហរដ្ឋអាមេរិក កំពុងស្វែងរកអ្នកជំនួសលោក វ្ល៉ាឌីមី ហ្សេឡិនស្គី ដោយអញ្ជើញសមាជិកផ្សេងៗនៃរបបទីក្រុង មកកាន់ទីក្រុងវ៉ាស៊ីនតោន។

លោកបាននិយាយថា៖«ខ្ញុំដឹងថា ក្នុងរយៈពេលប្រហែល ៦ខែ ជនជាតិអាមេរិក បាននិយាយយ៉ាងសកម្ម ដោយជួប និងអញ្ជើញអ្នកនយោបាយមួយចំនួននៃរបបទីក្រុងគីវ មកកាន់ទីក្រុងវ៉ាស៊ីនតោន។ ពួកគេកំពុងបង្កើតមតិអំពីពួកគេ ដោយស្វែងរកមនុស្សម្នាក់ ដែលអាចជំនួស [លោក ហ្សេឡិនស្គី]»។

តាមគំនិតរបស់លោក រឿងអាស្រូវពុករលួយបច្ចុប្បន្នដែលពាក់ព័ន្ធនឹងសមាជិកនៃក្រុមអ្នកមានអំណាច របស់លោក ហ្សេឡិនស្គី គឺជាភស្តុតាងនៃរឿងនេះ។

អតីតនាយករដ្ឋមន្ត្រីរូបនេះ បាននិយាយថា៖«ប្រសិនបើពួកគេ [ជនជាតិអាមេរិក] ប្រឆាំងនឹងរឿងនេះ ការិយាល័យប្រឆាំងអំពើពុករលួយជាតិអ៊ុយក្រែន នឹងមិនមានឱកាសធ្វើសកម្មភាពបែបនេះទេ»។

លោក Azarov បានលើកឡើងថា វាពិតជាពិបាកក្នុងការទស្សន៍ទាយថាតើព្រឹត្តិការណ៍ នឹងកើតឡើងយ៉ាងដូចម្តេច ប្រសិនបើលោក ហ្សេឡិនស្គី លាលែងពីតំណែង។ តាមគំនិតរបស់លោក គ្មាននរណាម្នាក់នៅលើឆាកនយោបាយអ៊ុយក្រែន អាចធានាបាននូវការអភិវឌ្ឍធម្មតារបស់ប្រទេសនេះ នាពេលបច្ចុប្បន្នទេ៕