អាជ្ញាធរស៊ើបអង្កេតក្នុងប្រទេសឥណ្ឌា បានចាប់ខ្លួនបុរសម្នាក់ពាក់ព័ន្ធនឹងការបំផ្ទុះរថយន្តនៅក្នុងទីក្រុងញូវដែលី កាលពីសប្តាហ៍មុន។ ការបំផ្ទុះ បានកើតឡើងនៅជិតបរិវេណប្រវត្តិសាស្ត្រ Red Fort ដោយបានសម្លាប់មនុស្ស១០នាក់ និងជាង៣០នាក់ផ្សេងទៀតរងរបួស។ 

រដ្ឋាភិបាលប្រទេសឥណ្ឌាបានចាត់ទុកការបំផ្ទុះនេះថាជា «ឧបទ្ទវហេតុភេរវកម្ម» ដែលប្រព្រឹត្តឡើងដោយ «កងកម្លាំងប្រឆាំងជាតិ»។ អាជ្ញាធរបាននិយាយកាលពីថ្ងៃអាទិត្យថា រថយន្តដែលពាក់ព័ន្ធក្នុងការបំផ្ទុះ ត្រូវបានចុះបញ្ជីឈ្មោះរបស់ជនសង្ស័យដែលត្រូវបានចាប់ខ្លួន ហើយបុរសនេះជាអ្នកស្រុកនៅតំបន់ Kashmir ដែលមានជម្លោះ។

អាជ្ញាធរក៏បាននិយាយផងដែរថា អ្នកបើករថយន្តដែលបានស្លាប់ក្នុងការផ្ទុះនោះជាគ្រូពេទ្យមកពីតំបន់ Kashmir។ ពួកគេជឿថា បុរសជាម្ចាស់រថយន្ត និងអ្នកបើករថយន្តដែលបានស្លាប់ បានរួមគំនិតគ្នាដើម្បីទិញរថយន្តនិងធ្វើការវាយប្រហារ។ ប្រព័ន្ធផ្សព្វផ្សាយក្នុងស្រុកបានដកស្រង់ប្រភពស៊ើបអង្កេតដែលនិយាយថា អ្នកបើកបររថយន្តអាចមានទំនាក់ទំនងជាមួយក្រុមសកម្មប្រយុទ្ធអ៊ីស្លាមនិយម មានមូលដ្ឋាននៅប្រទេសប៉ាគីស្ថាន។