ជនភៀសខ្លួនប៉ាឡេស្ទីននៅហ្កាហ្សាភាគកណ្តាល បានប្រមូលទ្រព្យសម្បត្តិ និងលើកតង់ដែលខូចខាតឡើងវិញ កាលពីថ្ងៃអាទិត្យ បន្ទាប់ពីខ្យល់បក់និងភ្លៀងធ្លាក់ខ្លាំង បានវាយបោកបក់ទៅលើតង់បណ្តោះអាសន្នរបស់ពួកគេក្នុងតំបន់ Al-Zawayda។ អ្នកស្រី Jihan Al-Rifi ជាម្តាយមានកូន៦នាក់ បានប្រាប់សារព័ត៌មានរ៉យទ័រថា តង់គ្រួសាររបស់អ្នកស្រីបានដួលរលំ និងលិចទឹក អំឡុងពេលព្យុះកាលពីពេលយប់ ដោយបង្កការខូចខាតដែលបានកើតឡើងដល់ទីជម្រករបស់អ្នកស្រី។ 

អ្នកស្រី Al-Rifi បាននិយាយនៅពេលឈរនៅខាងក្នុងតង់ដែលខូចរបស់អ្នកស្រីថា «វាមិនអាចរស់នៅបានទៀតទេ ហើយប្រជាជនប៉ាឡេស្ទីនដែលរស់នៅក្នុងជំរំបណ្ដោះអាសន្នទាំងនេះ បានអំពាវនាវសុំតង់ថ្មី និងសំពត់តង់ ដើម្បីជំនួសទីជម្រកដែលរហែក។ 

តំបន់ហ្កាហ្សាដ៏ធំធេង ត្រូវបានពង្រាបទៅជាវាលរហោស្ថានដោយការទម្លាក់គ្រាប់បែករបស់អ៊ីស្រាអែលក្នុងរយៈពេលពីរឆ្នាំកន្លងទៅនេះ ដែលបានសម្លាប់មនុស្សប្រហែល៦៨.០០០នាក់ នេះបើយោងតាមអាជ្ញាធរសុខាភិបាលតំបន់ហ្កាហ្សា ខណៈបទឈប់បាញ់ថ្មី បានចូលជាធរមានកាលពីថ្ងៃទី ១០ ខែតុលា។ 

បទឈប់បាញ់ដែលសម្របសម្រួលដោយសហរដ្ឋអាមេរិក បានបញ្ឈប់សង្គ្រាមដ៏បំផ្លាញរយៈពេលពីរឆ្នាំនៅតំបន់ហ្កាហ្សា ដែលបង្កឡើងដោយការវាយប្រហារកាលពីថ្ងៃទី៧ ខែតុលា ឆ្នាំ២០២៣ ដែលខ្មាន់កាំភ្លើងដឹកនាំដោយក្រុមហាម៉ាសបានសម្លាប់ពលរដ្ឋអ៊ីស្រាអែលប្រហែល១.២០០នាក់ និងបានចាប់ចំណាប់ថ្នូរ២៥១នាក់យកទៅតំបន់ហ្កាហ្សា នេះបើយោងតាមចំនួនសរុបរបស់អ៊ីស្រាអែល។