តុលាការកំពូលថៃកាលពីថ្ងៃចន្ទ ១៧ វិច្ឆិកា បានបញ្ជាឱ្យអតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត់ (Thaksin Shinawatra) ដែលជាប់ពន្ធនាគារ ឱ្យបង់ពន្ធលើការលក់ក្រុមហ៊ុនទូរគមនាគមន៍របស់លោក ដោយរបាយការណ៍បានបង្ហាញថាចំនួនទឹកប្រាក់ដែលត្រូវបង់មានប្រហែលកន្លះពាន់លានដុល្លារអាមេរិក។

កាលពីឆ្នាំ ២០០៦ លោកថាក់ស៊ីន ត្រូវបានរារាំងដោយការចោទប្រកាន់ពីបទពុករលួយ និងជាប់គាំងក្នុងភាពចម្រូងចម្រាសលើការលក់ភាគហ៊ុនដោយមិនបង់ពន្ធនៅក្នុងក្រុមហ៊ុនរបស់លោក គឺក្រុមហ៊ុន Shin Corp ទៅឱ្យក្រុមហ៊ុនសិង្ហបុរី Temasek Holdings ។  

ក្រោយមកនៅឆ្នាំដដែលនោះ លោកត្រូវបានបណ្តេញចេញពីតំណែងជានាយករដ្ឋមន្ត្រីក្នុងរដ្ឋប្រហារ ហើយបន្ទាប់មកបាននិរទេសខ្លួនអស់រយៈពេលជាងមួយទសវត្សរ៍។

អ្នកនយោបាយវ័យ៧៦ ឆ្នាំរូបនេះ ដែលជាអ្នកមានបំផុតមួយរូបរបស់ប្រទេសថៃ បច្ចុប្បន្នកំពុងជាប់ពន្ធនាគារនៅទីក្រុងបាងកក ពីបទពុករលួយក្នុងអំឡុងពេលកាន់តំណែងរបស់លោក។

អ្នកនាំពាក្យតុលាការលោក Suriyan Hongvilai បានប្រាប់សារព័ទ៌មាន AFPថា កាលពីថ្ងៃចន្ទ តុលាការកំពូលបានបដិសេធសេចក្ដីសម្រេចរបស់តុលាការឧទ្ធរណ៍ក្នុងសំណុំរឿងពន្ធ ដោយបង្ខំឱ្យលោកថាក់ស៊ីន អនុវត្តតាមបញ្ជារបស់នាយកដ្ឋានចំណូលឱ្យបង់ពន្ធ ។