បាល់ទាត់៖ ការប្រកួត​បាល់ទាត់​ជើងឯក​ក្លិប​កំពូល​អឺរ៉ុប (UEFA Champion League) វគ្គ ​១៦​ក្រុម​ចុងក្រោយ​ជើង​ទី​១ មាន​ពីរ​ប្រកួត​ទៀត​ក្នុងនោះ​ក្លិប​អង់គ្លេស Liverpool ទទួល​ក្លិប​មកពី​អ៊ីតាលី Inter Milan នៅ​ទឹកដី Anfield ខណៈ Bayern Munich របស់​អាល្លឺម៉ង់ត្រូវធ្វើ​ដំណើរ​ទៅកាន់​ប្រទេស​អូទ្រីសជួប​ជាមួយ Salzburg​។​

​យប់​នេះ​ប្រធាន​ក្រុម Liverpool កីឡាករ Jorden Henderson អាច​ត្រឡប់​មកលេង​បាន បន្ទាប់ពី​មាន​បញ្ហា​ជង្គង់​ក្នុងការ​ប្រកួត​ជាមួយ Burnley កាលពី​ថ្ងៃទី​អាទិត្យ​។ កីឡាករ​ទើប​ចុះហត្ថលេខា​កាលពី​ខែមករា Luis Diaz​ ក៏​ជា​កម្លាំង​ថ្មី​សម្រាប់​ហង្ស​ក្រហម Liverpool ​ផង​ដែរ​។​ ​គ្រូបង្វឹក​លោក Jurgen Klopp បញ្ជាក់ថា​ ក្រៅពី​របួស​កីឡាករ​ម្នាក់ ក្លិប​គ្មាន​បញ្ហា​របួស​បន្ថែម​នោះទេ​។ ទាក់ទង​នឹង​កីឡាករ Sadio Mane និង Mohamad Salah លោក​បញ្ជាក់ថា​ ពូកគេ​ជាសះស្បើយ​អស់ហើយគ្មានអ្វី​បារម្ភ​នោះទេ​។​ ​ចំនែក Inter Milan ថ្ងៃនេះ​នឹង​អវត្តមាន​កីឡាករ​សំខាន់ៗ​មួយចំនួន​ដូចជា Joaquin Correa និង ​Robin Gosens ដោយសារ​របួស​ភ្លៅ ខណៈដែល​កីឡាករ Nicolo Barella ត្រូវ​បញ្ឈរជើង បន្ទាប់ពី​ត្រូវ​ពិន័យ​កាត​ក្រហម​ពេល​លេង​ក្នុង​វគ្គ​ចែក​ពូ​ល​ជាមួយនឹង Real Madrid​។ បន្ថែម​ពីនេះ​កីឡាករ Aleksandar Kolarov មិនអាច​លេង​បានទេ បន្ទាប់ពី​ដកចេញ​ពី​បញ្ជី​កីឡាករដោយ​ដាក់​កីឡាករ Gosens និង Felipe Caicedo ចូល​។ កីឡាករ Stefano Sensi ជា​កីឡាករ​មួយរូប​ទៀត​ដែល​ដកចេញ ក្រោយ​កីឡាករ​រូបនេះ​ផ្ទេរ​ទៅកាន់​ក្លិប Sampdoria ក្នុង​រូបភាព​ខ្ចី​ជើង​ខែ​មុន​។ ចំនែក​អតីត​ខ្សែប្រយុទ្ធ Man City Edin Dzeko ដែល​ស៊ុត ៣​ប្រកួត​ចុងក្រោយ​ជាមួយ Liverpool នឹង​ដឹកនាំ​ក្នុង​តំណែង​ប្រយុទ្ធ​ជាមួយ Lautaro Martinez ខណៈ Alexis Sanchez អាចជា​ជម្រើស​បម្រុង​។​

​ពីរ​ប្រកួត​ចុងក្រោយក្នុង​ក្របខណ្ឌ Uefa Champion League ឆ្នាំ​២០០៨ Liverpool ឈ្នះ​ទាំងពីរ​ប្រកួត ២​ទល់នឹង​០ និង ១​ទល់នឹង​០​។​ ​ដំណាលគ្នា​នេះដែរ ក្លិប​ខ្លាំង​អាល្លឺម៉ង់ក៏បាន​ត្រៀមខ្លួន​រួចរាល់​ដែរ​ហើយ​ជួប​ជាមួយ​ក្លិប​អូទ្រីស Salzburg នៅ​ពហុ​កីឡដ្ឋាន Red Bull Arena។ យប់​នេះអ្នកចាំទី Manuel Neuer កីឡាករ Leon Goretzka និង​កីឡាករ​កាណាដា Alphonso Davies អវត្តមាន​ដោយសារ​របួស ខណៈដែល​កីឡាករ Jamal Musiala ធ្វើ​ច​ត្តា​ឡី​ស័ក​។ តែ​កីឡាករ​សំខាន់​មួយចំនួនទៀត​គ្មាន​បញ្ហា​នោះទេ​។ ដោយឡែកក្លិប ​Salzburg ក៏​ប្រឈម​បញ្ហា​កីឡាករ​រងរបួស​ដែរ​ដូចជា​កីឡាករ​ Bernardo, Zlatko Junuzovic, Sekou Koita, Junior Adamu, Nicolas Seiwald និង Benjamin Sesko​។ ៤​ប្រកួត​ចុងក្រោយពី​ឆ្នាំ​២០០៩ ដល់​២០២០ ក្រុម​ទាំងពីរ​ជួបគ្នា​បួន​ដង Bayern Munich ឈ្នះ​ពីរដង និង​ស្មើ​មួយ​៕

អត្ថបទ៖ គង់ ហួន