អាហ្រ្វិកខាងត្បូង នឹងធ្វើជាម្ចាស់ផ្ទះនៃកិច្ចប្រជុំកំពូល G20 ដែលជាព្រឹត្តិការណ៍លើកដំបូងមិនធ្លាប់មានលើទឹកដីអាហ្វ្រិក នៅថ្ងៃទី ២២-២៣ ខែវិច្ឆិកា ចុងសប្ដាហ៍នេះ។ យ៉ាងណាមិញ ក្តីសង្ឃឹមសម្រាប់សេចក្តីប្រកាសដ៏រឹងមាំមួយស្តីពីអាកាសធាតុ និងការបន្ធូរបន្ថយបំណុលសម្រាប់ប្រទេសកំពុងអភិវឌ្ឍ ហាក់ស្ដួចស្ដើងខ្លាំងណាស់ ស្របពេលភាពតានតឹងភូមិសាស្ត្រនយោបាយកម្រិតខ្ពស់ ហើយលោកប្រធានាធិបតីអាមេរិក Donald Trump កំពុងធ្វើពហិការមិនទៅចូលជំនួបដ៏ធំមួយនេះ។

ទីក្រុងវ៉ាស៊ីនតោន បានច្រានចោលរបៀបវារៈរបស់អាហ្វ្រិកខាងត្បូង ក្នុងការលើកកម្ពស់សាមគ្គីភាពជាសកល និងការជួយប្រទេសកំពុងអភិវឌ្ឍឱ្យសម្របខ្លួនទៅនឹងបម្រែបម្រួលអាកាសធាតុកាន់តែអាក្រក់ ការផ្លាស់ប្តូរទៅប្រើថាមពលស្អាត និងបន្ថយបន្ទុកបំណុល។ អ្នកជំនាញនិយាយថា ចំណុចទាំងនេះអាចប៉ះពាល់កិច្ចប្រជុំកំពូល ប៉ុន្តែថ្នាក់ដឹកនាំទាំងឡាយនៅតែអាចស្វែងរកចំណុចរួមមួយបាន។

អវត្តមានរបស់លោក Trump នៅជំនួប G20 ក៏បានផ្តល់ឱកាសមួយសម្រាប់ម្ចាស់ផ្ទះអាហ្រ្វិកខាងត្បូង ក្នុងការកំណត់របៀបវារៈរបស់ខ្លួន។ ទោះជាបែបនេះក្ដី ការព្រងើយកន្តើយចំពោះអវត្តមានលោក Trump ប្រហែលមិនអាចទៅរួចទេ ព្រោះថា នៅចុងបញ្ចប់នៃកិច្ចប្រជុំនេះ ប្រធានាធិបតីអាហ្រ្វិកខាងត្បូង លោក Cyril Ramaphosa ត្រូវប្រគល់តំណែងម្ចាស់ផ្ទះ G20 ថ្មីឱ្យដល់សមាជិកបន្ទាប់ ដែលនោះគឺជាលោក Trump ផ្ទាល់។

អំឡុងដំណើរការរៀបចំកិច្ចប្រជុំកំពូលនេះនៅទីតាំង Soweto ជាយក្រុង Johannesburg កាលពីសប្តាហ៍មុន លោក Ramaphosa បាននិយាយថា "លោកមិនចង់ប្រគល់តំណែងម្ចាស់ផ្ទះទៅឱ្យកៅអីទទេឡើយ ប៉ុន្តែកៅអីទំនេរមួយនេះនឹងនៅក្នុងជំនួបនោះ"។ លោកបន្តថា លោកនឹង "ផ្ទេរតំណែងម្ចាស់ផ្ទះទៅឱ្យកៅអីទទេនោះជានិមិត្តរូប ហើយបន្ទាប់មកនឹងធ្វើកិច្ចពិភាក្សាជាមួយលោក Trump "៕