បន្ទាប់ពីមានកិច្ចប្រជុំជាមួយប្រមុខអង្គការណាតូ (NATO) នាយករដ្ឋមន្ត្រីស្លូវ៉ាគី លោក Robert Fico បាននិយាយថា ស្លូវ៉ាគីចង់ឲ្យសម្ព័ន្ធភាពយោធាមួយនេះបង្កើនការការពារដែនអាកាស នៅក្នុងប្រទេសនេះ ពោលគឺនៅព្រំដែនប៉ែកខាងកើតរបស់ខ្លួន។

ក្នុងអំឡុងពេលមានកិច្ចពិភាក្សា នៅទីក្រុង Bratislava ជាមួយអគ្គលេខាធិការអង្គការណាតូ លោក Mark Rutte លោក Fico ក៏បាននិយាយការពារផងដែរដល់ផែនការរបស់ស្លូវ៉ាគី ក្នុងការសម្រេចលើការពន្លឿនផ្ទាល់ខ្លួន និងរចនាសម្ព័ន្ធនៃការចំណាយលើវិស័យការពារជាតិ នៅប៉ុន្មានឆ្នាំខាងមុខ ខណៈដែលសមាជិករបស់អង្គការណាតូភាគច្រើន ដំឡើងកញ្ចប់ថវិកាវិស័យការពារជាតិ។

ស្លូវ៉ាគីបានជំទាស់នឹងគោលនយោបាយរបស់សហភាពអឺរ៉ុប (EU) ក្នុងការជួយដល់ការការពាររបស់អ៊ុយក្រែន ប្រឆាំងនឹងការឈ្លានពានរបស់រុស្ស៊ី កាលពីឆ្នាំ២០២២ ហើយលោក Fico ក៏បានបញ្ជាក់ម្តងទៀតនៅក្នុងជំនួបរបស់លោកជាមួយលោក Rutte ថា រដ្ឋាភិបាលនឹងមិនផ្គត់ផ្គង់អាវុធបង្កគ្រោះថ្នាក់ដល់អាយុជីវិតដោយផ្ទាល់ដល់ទីក្រុងគីវនោះឡើយ លើកលែងតែមានការអនុញ្ញាតកិច្ចសន្យាពាណិជ្ជកម្ម។

បន្ទាប់ពីកិច្ចប្រជុំកាលពីល្ងាចថ្ងៃអង្គារ (ទី១៨ ខែវិច្ឆិកា) ការិយាល័យរដ្ឋាភិបាលស្លូវ៉ាគី បានឲ្យដឹងនៅក្នុងសេចក្តីថ្លែងការណ៍មួយថា៖ «ក្នុងអំឡុងពេលមានកិច្ចពិភាក្សារួមគ្នា លោកនាយករដ្ឋមន្ត្រីក៏បានស្នើឲ្យអគ្គលេខាធិការពង្រឹងការការពារដែនអាកាសរបស់ប្រទេសស្លូវ៉ាគី»។

គួរបញ្ជាក់ថា ស្លូវ៉ាគីបានស្វែងរកការពង្រឹងសមត្ថភាពការពារដែនអាកាសរបស់ខ្លួន ក្នុងប៉ុន្មានឆ្នាំថ្មីៗនេះ ក្នុងនោះរួមទាំងការទិញប្រព័ន្ធការពារពីអ៊ីស្រាអែល និងការទិញយន្តហោះចម្បាំង F-16 ថ្មីផងដែរ។ ប្រទេសនេះស្ថិតក្នុងចំណោមរដ្ឋ EU នៅព្រំដែនប៉ែកខាងកើត ដែលបានយល់ព្រមកាលពីខែកញ្ញា ជុំវិញតម្រូវការ «ជញ្ជាំងការពារយានដ្រូន» ដែលមានកម្រិតចាប់បានខ្ពស់៕