ប្រទេសប៉ូឡូញ នៅថ្ងៃពុធ (ទី១៩ ខែវិច្ឆិកា) នេះ បានប្រកាសបិទស្ថានកុងស៊ុលរុស្ស៊ីដែលប្រតិបត្តិការចុងក្រោយនៅប៉ូឡូញ នៅភាគខាងជើងនៃទីក្រុង Gdansk ហើយបានបង្ហាញពីសញ្ញានៃវិធានការសងសឹកបន្ថែមទៀត ដែលនឹងត្រូវធ្វើឡើងបន្ទាប់ពីមានការវាយប្រហារលើហេដ្ឋារចនាសម្ព័ន្ធផ្លូវដែកប៉ូឡូញ កាលពីចុងសប្តាហ៍កន្លងទៅ។

ដោយលើកឡើងពីហេតុការណ៍ដែលរុស្ស៊ីបានបដិសេធមិនពាក់ព័ន្ធ លោក Radoslaw Sikorski បានប្រាប់សន្និសីទសារព័ត៌មាននៅទីក្រុងវ៉ាសូវីថា៖ «រុស្ស៊ីមិនបានបញ្ឈប់ការវាយប្រហារទាំងនេះទេ ហើយប្រទេសនេះកំពុងធ្វើឲ្យហេតុការណ៍កាន់តែធ្ងន់ធ្ងរឡើងៗ។ នៅពេលដែលចេតនានៃអំពើវិឆ្ឆេទកម្ម គឺជាការស្លាប់ និងរបួសរបស់មនុស្ស យើងកំពុងដោះស្រាយជាមួយនឹងអំពើភេរវកម្មរបស់រដ្ឋ។ សម្រាប់ហេតុផលនោះ ខ្ញុំបានសម្រេចចិត្តបិទស្ថានកុងស៊ុលរុស្ស៊ី នៅទីក្រុង Gdansk។ ហើយនេះនឹងមិនមែនជាការឆ្លើយតបទាំងស្រុងរបស់យើងនោះឡើយ»។

លោក Sikorski បានបន្ថែមថា លោកនឹងស្នើជាផ្លូវការឲ្យមានការធ្វើបត្យាប័នជនសង្ស័យធ្វើអំពើវិឆ្ឆេទកម្មនេះពីប្រទេសបេឡារុស «នៅថ្ងៃនេះ ឬថ្ងៃស្អែក»។

ជាមួយគ្នានេះ លោកក៏បានបង្ហាញនូវការទទួលបានព័ត៌មានថ្មីពីសេវាស៊ើបការណ៍សម្ងាត់របស់ប៉ូឡូញ ទាក់ទងនឹងការប៉ុនប៉ងថ្មីៗចំនួន ២ ដែលមានបំណងធ្វើរថភ្លើងដឹកអ្នកដំណើរធ្លាក់ចេញពីផ្លូវ នៅច្រករបៀងផ្លូវដែកសំខាន់ៗដែលតភ្ជាប់ទីក្រុងវ៉ាសូវី ទៅ Lublin និង Deblin។

ហើយបើយោងតាមលោក Sikorski ដដែល បានឲ្យដឹងទៀតថា អ្នកស៊ើបអង្កេតបានកំណត់ថា ជនដៃដល់ គឺជាពលរដ្ឋអ៊ុយក្រែនដែលសហការជាពិសេសជាមួយទីភ្នាក់ងារចារកម្មរុស្ស៊ី (GRU) ដែលលោកបាននិយាយថា តែងតែជួលក្រុមប្រូកស៊ី ក្រោមអត្តសញ្ញាណក្លែងក្លាយ៕