យោងតាមប្រភពមួយបានប្រាប់សារព័ត៌មាន AFP កាលពីថ្ងៃពុធ ១៩ វិច្ឆិកាសប្ដាហ៍នេះថា សំណើសន្តិភាពថ្មីរបស់សហរដ្ឋអាមេរិកសម្រាប់អ៊ុយក្រែននឹងមើលឃើញទីក្រុងគីវ( Kyiv ) បោះបង់ទឹកដី និងកាត់បន្ថយកងទ័ពរបស់ខ្លួនជាងពាក់កណ្តាល ខណៈការវាយប្រហាររបស់រុស្ស៊ីនៅភាគខាងលិចនៃប្រទេសនេះ បានសម្លាប់មនុស្ស ២៦ នាក់ រួមទាំងកុមារបីនាក់។

សំណើនេះហាក់ដូចជានិយាយឡើងវិញនូវលក្ខខណ្ឌអតិបរមារបស់រុស្ស៊ីដើម្បីបញ្ចប់សង្គ្រាម  ជាការទាមទារដែលត្រូវបានអ៊ុយក្រែនបដិសេធជារៀងរហូតមក ថាស្មើនឹងការចុះចាញ់។

គំនិតផ្តួចផ្តើមដ៏គួរឱ្យភ្ញាក់ផ្អើលនេះបានកើតឡើង ខណៈមីស៊ីលរបស់រុស្ស៊ីបានបាញ់ស្រាចលើទីក្រុង Ternopil ភាគខាងលិច នៅឆ្ងាយពីសមរភូមិជួរមុខ ដែលជាការវាយប្រហារដ៏សាហាវបំផុតមួយក្នុងចំណោមការវាយប្រហារដ៏ខ្លាំងក្លាបំផុតជាច្រើន លើភាគខាងលិចអ៊ុយក្រែនចាប់តាំងពីការឈ្លានពានបានចាប់ផ្តើមនៅឆ្នាំ ២០២២។ 

ទន្ទឹមនឹងនេះ កិច្ចខិតខំប្រឹងប្រែងរបស់ប្រធានាធិបតីអ៊ុយក្រែន Volodymyr Zelenskyy ដើម្បីចូលរួមជាមួយរដ្ឋបាលរបស់ប្រធានាធិបតីអាមេរិក Donald Trump ក្នុងដំណើរការសន្តិភាពអំឡុង ដំណើរទស្សនកិច្ចដ៏គួរឱ្យភ្ញាក់ផ្អើលមួយទៅកាន់ប្រទេសទួរគីបានបរាជ័យ បន្ទាប់ពីបេសកជនអាមេរិកមួយរូប ដែលគេគិតថានឹងចូលរួមជាមួយរូបលោក ពុំបានធ្វើដំណើរទៅជួបនោះទេ។ 

ប្រភពមួយដឹងសំណើសន្តិភាពរបស់សហរដ្ឋអាមេរិក ដែលមិនចង់បញ្ចេញឈ្មោះ បានប្រាប់សារព័ត៌មាន AFP ថា សេចក្តីព្រាងសំណើសន្តិភាពរបស់សហរដ្ឋអាមេរិក ចែងអំពី ការទទួលស្គាល់តំបន់គ្រីម៉េ និងតំបន់ផ្សេងទៀតដែលរុស្ស៊ីបានដណ្តើមយក និងការកាត់បន្ថយកងទ័ពមកត្រឹម ៤០០.០០០ នាក់៕