រដ្ឋមន្រ្តីការពារជាតិអាល្លឺម៉ង់ លោក Boris Pistorius បានលើកឡើងកាលពីថ្ងៃពុធ (១៩ វិច្ឆិកា) ថា អាល្លឺម៉ង់ នឹងមិនឈានដល់គោលដៅចំណាយលើវិស័យការពារជាតិរបស់ខ្លួនក្នុងអត្រា ៣,៥% នៃផលិតផលក្នុងស្រុកសរុប (GDP) នៅក្នុងឆ្នាំ២០២៩ ខាងមុខនោះទេ។ 

ថ្លែងនៅទីក្រុង Munich លោក Pistorius បាននិយាយថា ការចំណាយលើវិស័យការពារជាតិរបស់អាល្លឺម៉ង់ នឹងមានត្រឹមតែ ៣,០៥% ប៉ុណ្ណោះនៃ GDP នៅក្នុងឆ្នាំនោះ។ នេះគឺតិចជាងអត្រា ៣,៥% ដែលលោករដ្ឋមន្ត្រីហិរញ្ញវត្ថុ Lars Klingbeil បានសន្យាកាលពីដើមឆ្នាំ២០២៥។ 

គួររម្លឹកថា កិច្ចប្រជុំកំពូលរបស់អង្គការណាតូ នៅទីក្រុងឡាអេ ក្នុងឆ្នាំនេះ បានព្រមព្រៀងគ្នាថា សម្ព័ន្ធយោធានឹងឈានដល់គោលដៅចំណាយថ្មីចំនួន ៥% នៃ GDP នៅឆ្នាំ២០៣៥ ។ គោលដៅនោះចែកចេញជាពីរគឺ អត្រា ៣,៥% នៅក្នុងថវិកាការពារជាតិ និងអត្រា ១,៥% ទៀតគឺនៅក្នុងការចំណាយទាក់ទងនឹងវិស័យការពារជាតិ។

កាលពីខែមិថុនា រដ្ឋាភិបាលអាល្លឺម៉ង់ បានអនុម័តសេចក្តីព្រាងថវិកាមួយ ដែលភ្ជាប់មកជាមួយនឹងការកើនឡើងយ៉ាងធំក្នុងការចំណាយលើវិស័យការពារជាតិ រួមជាមួយនឹងផែនការហិរញ្ញវត្ថុរហូតដល់ឆ្នាំ២០២៩ ក្នុងក្ដីសង្ឈឹមថា នឹងអាចបំពេញគោលដៅការពារជាតិរបស់ណាតូបាន។

ទិន្នន័យបង្ហាញថា ប៉ូឡូញគឺជាសមាជិកណាតូ ដែលចំណាយច្រើនជាងគេលើវិស័យការពារជាតិគិតជាចំណែកសេដ្ឋកិច្ចរបស់ខ្លួន ក្នុងអត្រាដល់ទៅ ៤,៤៨% តាមពីក្រោយដោយលីទុយអានី ក្នុងអត្រា ៤% និងឡាតវី មានចំនួន ៣,៧៣% ៕