ប្រទេសចិន បានចាត់វិធានការផ្ដល់ភាពងាយស្រួលកាន់តែខ្លាំងជាងមុនសម្រាប់អ្នករស់នៅកោះតៃវ៉ាន់ ក្នុងការទៅដើរលេងកម្សាន្តនៅដីគោក ដោយពង្រីកលទ្ធភាពទទួលបានលិខិតអនុញ្ញាតធ្វើដំណើរពេលចូលមកដល់ បើទោះបីជាភាពតានតឹងឆ្លងច្រកសមុទ្រនៅតែមានក៏ដោយ។

ដោយចូលជាធរមាននៅថ្ងៃព្រហស្បតិ៍ (២០ វិច្ឆិកា) នេះ អ្នកកោះតៃវ៉ាន់អាចទទួលបានលិខិតអនុញ្ញាតចូលតែមួយលើក (Single-Entry) នៅច្រកចូលចំនួន ១០០កន្លែង ដោយកើនឡើងពីតួលេខ ៥៨ច្រក ពីមុន។ បញ្ជីដែលបានពង្រីកនេះ គ្របដណ្ដប់លើចំណុចត្រួតពិនិត្យតាមដីគោក អាកាស ផ្លូវដែក និងសមុទ្រ រួមទាំងអ្នកដែលធ្វើដំណើរតាមស្ពាន ហុងកុង-ជូហៃ-ម៉ាកាវ ហើយនិងច្រក Kashgar និង Khorgas ក្នុងតំបន់ស៊ិនជាំង (ទីបេ) និងតំបន់ហ្វ៊ូយ័ន នៅខេត្តហ៊ីឡុងជាំង។

អ្នកនាំពាក្យការិយាល័យកិច្ចការតៃវ៉ាន់របស់ប្រទេសចិន លោកស្រី Zhu Fenglian បាននិយាយក្នុងសន្និសីទសារព័ត៌មានមួយកាលពីថ្ងៃពុធថា ជនរួមជាតិតៃវ៉ាន់ អាចចូលដីគោកបានយ៉ាងងាយស្រួល និងសុវត្ថិភាព ដោយទទួលបានបទពិសោធន៍យ៉ាងពេញលេញនូវភាពកក់ក្តៅដូចនៅ "ផ្ទះ" របស់ខ្លួន។

លោកស្រី Zhu បាននិយាយថា ដំណើរការទាំងមូលដើម្បីទទួលលិខិតអនុញ្ញាតពេលមកដល់នេះ — ដែលអនុញ្ញាតឱ្យស្នាក់នៅរហូតដល់ ៣ខែ — នឹងចំណាយពេលត្រឹមតែ ៣០នាទីប៉ុណ្ណោះ ប្រសិនបើអ្នករស់នៅកោះតៃវ៉ាន់ មានឯកសារចាំបាច់។ អ្នកមកទស្សនាជាលើកដំបូងពីកោះតៃវ៉ាន់ ក៏នឹងមានការលើកលែងថ្លៃស្នើសុំលិខិតអនុញ្ញាតផងដែរ ហើយអាចរីករាយនឹងការចូលទស្សនាតំបន់ទេសភាពច្រើនជាង ៣ពាន់កន្លែង ដោយឥតគិតថ្លៃ៕