វេជ្ជបណ្ឌិតហាត់ការរាប់ពាន់នាក់ បានសម្រុកធ្វើកូដកម្មនៅទូទាំងប្រទេសទុយនេស៊ី កាលពីថ្ងៃពុធ (១៩ វិច្ឆិកា) ដើម្បីទាមទារប្រាក់ឈ្នួលខ្ពស់ជាងមុន និងបានព្រមានអំពីការដួលរលំជិតកើតមានឡើងដល់ប្រព័ន្ធសុខាភិបាល ជាផ្នែកនៃរលកចលាចលក្នុងសង្គមដ៏ទូលំទូលាយ ដែលរួមរឹតប្រទេសនេះ។

រលកតវ៉ាផ្នែកបរិស្ថាន និងប្រឆាំងរដ្ឋាភិបាលទុយនីស៊ី ដែលបង្កឡើងដោយវិបត្តិសេដ្ឋកិច្ចកាន់តែអាក្រក់ និងការរំខានសេវាសាធារណៈ បានបង្កជាបញ្ហាប្រឈមដ៏ធំបំផុតដល់លោកប្រធានាធិបតី Kais Saied ចាប់តាំងពីឡើងកាន់កាប់អំណាចនៅឆ្នាំ២០២១មក។

ហ្វូងបាតុករដែលកំពុងតវ៉ានៅរដ្ឋធានីប្រទេសនេះបាននិយាយថា "ពួកគេនឿយហត់ណាស់ប៉ុន្តែទទួលបានប្រាក់ខែតិច ហើយកំពុងធ្វើការនៅក្នុងប្រព័ន្ធដែលជិតខូចទៅហើយ"។ អ្នកតវ៉ាព្រមានថា "ប្រសិនបើគ្មានអ្វីផ្លាស់ប្តូរទេ នោះគ្រូពេទ្យកាន់តែច្រើននឹងលាឈប់ ហើយវិបត្តិនឹងកាន់តែជ្រៅទៅៗ"។

ក្រុមបាតុករពាក់អាវពេទ្យពណ៌ស កាន់ស្លាកដែលសរសេរថា "សេចក្តីថ្លៃថ្នូរសម្រាប់វេជ្ជបណ្ឌិត" និង "សង្គ្រោះមន្ទីរពេទ្យរបស់យើង" ក្នុងពេលប្រមូលផ្តុំនៅជិតសភាទុយនីស៊ី។ ក្រៅពីប្រាក់ឈ្នួលទាប ក្រុមតវ៉ាបានត្អូញត្អែរពីឧបករណ៍ហួសសម័យ និងកង្វះសម្ភារៈពេទ្យសំខាន់ៗ ដែលពួកគេនិយាយថា ជាកត្តារុញច្រានឱ្យអ្នកជំនាញសុខភាព ចាកចេញទៅធ្វើការនៅអឺរ៉ុប និងតំបន់ឈូងសមុទ្រ៕