អគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃពុធ (ទី១៩ ខែវិច្ឆិកា) បានថ្កោលទោសយ៉ាងខ្លាំង ចំពោះការវាយប្រហារដោយមីស៊ីល និងយានដ្រូនចុងក្រោយបង្អស់របស់រុស្ស៊ី ទៅលើអ៊ុយក្រែន ដែលទីក្រុងគីវ បានឲ្យដឹងថា បានសម្លាប់មនុស្សយ៉ាងតិច ២៥នាក់ ហើយជាច្រើននាក់ទៀតបានរងរបួស។

អ្នកនាំពាក្យរបស់លោក Guterres គឺលោក Stephane Dujarric បានប្រាប់សន្និសីទសារព័ត៌មានថា៖ «ខ្ញុំអាចប្រាប់អ្នកទាំងអស់គ្នាថា លោកអគ្គលេខាធិការថ្កោលទោសយ៉ាងខ្លាំង ចំពោះការវាយប្រហារដោយមីស៊ីល និងយានដ្រូននាពេលយប់ចុងក្រោយបង្អស់ ពីសំណាក់សហព័ន្ធរុស្ស៊ីលើតំបន់ជាច្រើនរបស់អ៊ុយក្រែន ដែលតាមសេចក្ដីរាយការណ៍ បានឲ្យដឹងថា បានសម្លាប់មនុស្សយ៉ាងហោចណាស់ ២៥នាក់ ក្នុងនោះមានរួមទាំងកុមារផងដែរ ហើយរាប់សិបនាក់ផ្សេងទៀតរងរបួស នៅក្នុងតំបន់លំនៅឋានចំនួន ២»។

ដោយសង្កត់ធ្ងន់ថា «ការវាយប្រហារលើជនស៊ីវិល និងហេដ្ឋារចនាសម្ព័ន្ធស៊ីវិល រំលោភលើច្បាប់មនុស្សធម៌អន្តរជាតិ» នោះ លោក Dujarric បាននិយាយថា ការវាយប្រហារបែបនេះ គឺ «មិនអាចទទួលយកបានឡើយ មិនថា នៅកន្លែងណានោះទេ ហើយសកម្មភាពទាំងនោះត្រូវតែបញ្ឈប់ជាបន្ទាន់»។

ដោយពណ៌នាការវាយប្រហារនាពេលយប់នោះថា ជា «ការវាយប្រហារមួយក្នុងចំណោមការវាយប្រហារដ៏អាក្រក់បំផុត លើជនស៊ីវិលបំផុត« ចាប់តាំងពីដើមដំបូងនៃសង្រ្គាម កាលពីជិត ៤ឆ្នាំមុន លោក Dujarric បានប្រាប់ថា នេះគូសបញ្ជាក់អំពីតម្រូវការឲ្យមានបទឈប់បាញ់។

គួរបញ្ជាក់ថា អាជ្ញាធរអ៊ុយក្រែនបានឲ្យដឹងថា យ៉ាងហោចណាស់មនុស្ស ២៥នាក់ រួមមានទាំងកុមារ ៣នាក់ផងដែរ បានបាត់បង់ជីវិត ហើយ ៧៣នាក់ផ្សេងទៀតបានរងរបួស បន្ទាប់ពីការវាយប្រហាររបស់រុស្ស៊ីបានត្រូវចំអគារលំនៅឋាន ក្នុងទីក្រុង Ternopil នៅភាគខាងលិចនៃប្រទេសអ៊ុយក្រែន កាលពីព្រឹកថ្ងៃពុធ ដោយធ្វើឲ្យវាក្លាយជាការវាយប្រហារបណ្ដាលឲ្យមានស្លាប់ច្រើនបំផុតលើកដំបូង ក្នុងរយៈពេលប៉ុន្មានខែថ្មីៗនេះ៕