នៅក្នុងរបាយការណ៍មួយដែលត្រូវបានចេញផ្សាយនៅថ្ងៃព្រហស្បតិ៍ (ទី២០ ខែវិច្ឆិកា) នេះ អង្គការ Save the Children (សង្គ្រោះកុមារ) បានឲ្យដឹងថា អាវុធជាតិផ្ទុះបានសម្លាប់ ឬធ្វើឲ្យកុមាររងរបួស ក្នុងកម្រិតខ្ពស់បំផុត កាលពីឆ្នាំមុន ខណៈដែលសង្រ្គាមកាន់តែរាលដាលខ្លាំងឡើងៗទៅកាន់ទីក្រុងនានា។

ដោយបានដកស្រង់តួលេខរបស់អង្គការសហប្រជាជាតិ (UN) អង្គការសប្បុរសធម៌ដែលមានមូលដ្ឋាននៅចក្រភពអង់គ្លេសមួយនេះ បានបញ្ជាក់ថា កុមារជិត ១២.០០០នាក់ ត្រូវបានសម្លាប់ ឬរងរបួស ក្នុងជម្លោះកាលពីឆ្នាំមុន នៅទូទាំងពិភពលោក។ នេះគឺជាចំនួនខ្ពស់បំផុត គិតចាប់តាំងពីកំណត់ត្រានេះ ត្រូវបានចាប់ផ្តើមកត់ក្នុងឆ្នាំ២០០៦ ហើយបានកើនឡើង ៤២ភាគរយ ខ្ពស់ជាងចំនួនសរុបក្នុងឆ្នាំ២០២០។

កាលពីមុន កុមារ នៅតំបន់សង្រ្គាម ទំនងជាស្លាប់ដោយសារកង្វះអាហារូបត្ថម្ភ ជំងឺ ឬប្រព័ន្ធសុខភាពដួលរលំ។ ប៉ុន្តែអង្គការ Save the Children បានលើកឡើងថា នៅពេលដែលជម្លោះ ដូចជានៅតំបន់ហ្កាហ្សា ប្រទេសស៊ូដង់ និងអ៊ុយក្រែន កើតឡើងកាន់តែច្រើនឡើងៗនៅក្នុងតំបន់ទីក្រុង ក្មេងៗកំពុងត្រូវរងគ្រោះ ខណៈដែលគ្រាប់បែក និងយានដ្រូនវាយប្រហារមន្ទីរពេទ្យ សាលារៀន និងតំបន់លំនៅឋាន។

យោងតាមរបាយការណ៍នេះ បានឲ្យដឹងថា ជាង ៧០ភាគរយនៃកុមាររងគ្រោះបាត់បង់ជីវិត នៅក្នុងតំបន់មានសង្រ្គាម ក្នុងឆ្នាំ២០២៤ គឺបណ្តាលមកពីអាវុធជាតិផ្ទុះ ដូចជាមីស៊ីល និងគ្រាប់បែកដៃ ដោយកើនឡើងពីកម្រិតជាមធ្យមប្រហែល ៥៩ភាគរយ ក្នុងរយៈពេលពីឆ្នាំ២០២០ ដល់ឆ្នាំ២០២៤។

ជម្លោះដែលបានអះអាងថា មានអ្នកស្លាប់ និងរបួសច្រើនជាងគេ ក្នុងចំណោមកុមារ នៅឆ្នាំ២០២៤ គឺនៅក្នុងដែនដីប៉ាឡេស្ទីន គឺតំបន់ហ្កាហ្សា និងតំបន់ West Bank ប្រទេសស៊ូដង់ សហភាពមីយ៉ាន់ម៉ា អ៊ុយក្រែន និងស៊ីរី។ របាយការណ៍បានសង្កត់ធ្ងន់ថា ជម្លោះបណ្ដាលឲ្យមានមនុស្សស្លាប់ច្រើនបំផុត ក្នុងរយៈពេលប៉ុន្មានឆ្នាំចុងក្រោយនេះ ជាពិសេសកុមារ គឺនៅតំបន់ហ្កាហ្សា ជាកន្លែងដែលអ៊ីស្រាអែលបានសម្លាប់កុមារយ៉ាងហោចណាស់ ២០.០០០នាក់ ចាប់តាំងពីអ៊ីស្រាអែលចាប់ផ្តើមសង្រ្គាមនៅលើដែនដីនេះ៕