វិមានក្រឹមឡាំង នៅថ្ងៃព្រហស្បតិ៍ (ទី២០ ខែវិច្ឆិកា) នេះ បានរិះគន់ការអត្ថាធិប្បាយ លើអាវុធនុយក្លេអ៊ែររបស់រុស្ស៊ី ដែលធ្វើឡើងដោយប្រធានក្រុមហ៊ុន Airbus ហើយបានចោទសួរថា ហេតុអ្វីបានជាមនុស្សដូចលោកប្រធានរូបនេះ ធ្វើឲ្យបញ្ហានេះក្លាយជារឿងធំដុំ ដោយនិយាយថា «បណ្ដាប្រទេសអឺរ៉ុបកាន់តែច្រើនឡើងបានបាត់បង់ភាពម្ចាស់ការរបស់ពួកគេហើយ»។

ប្រធានក្រុមហ៊ុន Airbus លោក Rene Obermann កាលពីថ្ងៃពុធ បានអំពាវនាវឲ្យបណ្តាប្រទេស នៅអឺរ៉ុប មានអាវុធនុយក្លេអ៊ែរយុទ្ធសាស្ត្រ ដើម្បីឆ្លើយតបទៅនឹងអ្វីដែលលោក បាននិយាយថា ជាការគំរាមកំហែងដែលបង្កឡើងដោយមីស៊ីល Iskander ដែលមានសមត្ថភាពបំពាក់នុយក្លេអ៊ែររបស់រុស្ស៊ី ជាអាវុធដែលត្រូវបានដាក់ពង្រាយដោយទីក្រុងមូស្គូនៅក្នុងដែនដី Kaliningrad របស់ខ្លួន។

នៅពេលត្រូវបានសួរអំពីការអត្ថាធិប្បាយរបស់លោក Obermann អ្នកនាំពាក្យវិមានក្រឹមឡាំង លោក Dmitry Peskov បានឆ្លើយថា៖ «ហេតុអ្វីបានជាគាត់មកពាក់ព័ន្ធនឹងអាវុធនុយក្លេអ៊ែរ?»។ 

លោកបានបញ្ជាក់ថា តំបន់ Kaliningrad គឺជាផ្នែករបស់ប្រទេសរុស្ស៊ី ហើយទីក្រុងមូស្គូ កំពុងធ្វើអ្វីគ្រប់យ៉ាងដែលចាំបាច់ ដើម្បីធានាសន្តិសុខរបស់ខ្លួន។

អ្នកនាំពាក្យរូបនេះបានបន្តថា៖ «វាគឹជាភស្តុតាងដែលបង្ហាញថា ប្រទេសអឺរ៉ុបកាន់តែច្រើនឡើងៗ កំពុងបាត់បង់ភាពម្ចាស់ការ និងការគិតពិចារណា តាមវិធីសាស្រ្តរបស់ពួកគេហើយ»។ 

លោក Peskov បានសង្កត់ធ្ងន់ថា៖ «វាគឺជារឿងគួរឲ្យសោកស្ដាយណាស់។ អ្នកខ្លះកំពុងធ្វើសេចក្តីថ្លែងការណ៍បង្កហេតុ និងអំពាវនាវឲ្យមានវិធានការបន្ថែមទៀត ដើម្បីបង្កើន និងធ្វើឲ្យភាពតានតឹងកាន់តែធ្ងន់ធ្ងរ។ យើងយល់ថា ជាការមិនសមរម្យឡើយ ដែលនិយាយបែបនេះ»៕