មន្ត្រីជាន់ខ្ពស់អាមេរិកមួយរូប បាននិយាយកាលពីថ្ងៃព្រហស្បតិ៍ (២០ វិច្ឆិកា) ថា ទីក្រុងវ៉ាស៊ីន កំពុងតែពិចារណាសកម្មភាពមួយចំនួន ដូចជាទណ្ឌកម្ម និងការចូលរួមរបស់មន្ទីរបញ្ចកោណ លើការប្រឆាំងភេរវកម្ម ជាផ្នែកមួយនៃផែនការដើម្បីបង្ខំរដ្ឋាភិបាលនីហ្សេរីយ៉ា ឱ្យការពារសហគមន៍គ្រិស្តសាសនិក និងសេរីភាពសាសនាឱ្យកាន់តែប្រសើរឡើង។

នីហ្សេរីយ៉ា កំពុងស្ថិតក្រោមការត្រួតពិនិត្យយ៉ាងតឹងរ៉ឹងពីលោកប្រធានាធិបតីអាមេរិក Donald Trump ដែលនៅដើមខែវិច្ឆិកានេះ លោកបានគំរាមចាត់វិធានការយោធា ជុំវិញការប្រព្រឹត្តមិនល្អចំពោះគ្រិស្តបរិស័ទក្នុងប្រទេសនេះ។ នីហ្សេរីយ៉ានិយាយថា ការអះអាងថាគ្រិស្តបរិស័ទប្រឈមការធ្វើទុក្ខបុកម្នេញ គឺជាការបំភ្លៃស្ថានភាពសន្តិសុខនៅទីនោះ ហើយមិនបានគិតគូរពីកិច្ចប្រឹងប្រែងការពារសេរីភាពសាសនារបស់ខ្លួន។

លោក Jonathan Pratt មន្ត្រីជាន់ខ្ពស់ដឹកនាំការិយាល័យកិច្ចការអាហ្វ្រិករបស់ក្រសួងការបរទេសអាមេរិក បានប្រាប់សភាកាលពីថ្ងៃព្រហស្បតិ៍ថា "រដ្ឋបាលលោក Trump កំពុងរៀបចំផែនការមួយដើម្បីលើកទឹកចិត្ត និងបង្ខំរដ្ឋាភិបាលនីហ្សេរីយ៉ា ឱ្យការពារសហគមន៍គ្រិស្តបរិស័ទកាន់តែប្រសើរឡើង និងកែលម្អសេរីភាពសាសនា"។ លោកបន្តថា "ផែនការនេះនឹងពិចារណាលើការចូលរួមរបស់រដ្ឋ និងរតនាគារអាមេរិកលើទណ្ឌកម្ម ក៏ដូចជាលទ្ធភាពនៃការចូលរួមរបស់ក្រសួងសង្គ្រាម (មន្ទីរបញ្ចកោណ) លើការប្រឆាំងភេរវកម្ម និងកិច្ចប្រឹងប្រែងផ្សេងទៀតដើម្បីការពារសហគមន៍សាសនា"។

កាលពីខែតុលា លោក Trump បានដាក់នីហ្សេរីយ៉ា ទៅក្នុងបញ្ជី «ប្រទេសដែលមានក្ដីបារម្ភជាពិសេស» ពោលគឺបញ្ជីនៃប្រជាជាតិដែលអាមេរិកនិយាយថា បានរំលោភលើសេរីភាពសាសនា។ ប្រធានាធិបតីរូបនេះក៏ព្រមានថា លោកស្នើឱ្យក្រសួងការពារជាតិ រៀបចំសម្រាប់លទ្ធភាពនៃសកម្មភាពយោធា «ដ៏ឆាប់រហ័ស» នៅនីហ្សេរីយ៉ា ប្រសិនបើប្រទេសអាហ្វ្រិកខាងលិចមួយនេះបរាជ័យ មិនអាចបង្ក្រាបការកាប់សម្លាប់គ្រិស្តបរិស័ទទេនោះ៕