រុស្ស៊ី បានលើកឡើងកាលពីថ្ងៃព្រហស្បតិ៍ (២០ វិច្ឆិកា) ថា ផែនការសន្តិភាពណាមួយសម្រាប់អ៊ុយក្រែន នឹងត្រូវតែលុបបំបាត់មូលហេតុដើមនៃជម្លោះ ហើយបញ្ជាក់ជាថ្មីថា បើទោះជាមានការប្រាស្រ័យទាក់ទងជាមួយភាគីអាមេរិកក៏ពិតមែន ប៉ុន្តែបច្ចុប្បន្ន ពុំមានការចរចាណាមួយជាមួយទីក្រុងវ៉ាស៊ីនតោន លើផែនការសន្តិភាពបែបនេះទេ។

ប្រភពរបស់សារព័ត៌មានរ៉យទ័រ បាននិយាយនៅថ្ងៃពុធសប្ដាហ៍នេះថា អាមេរិក បានផ្តល់សញ្ញាប្រាប់អ៊ុយក្រែនថា ខ្លួនត្រូវតែទទួលយកក្របខណ្ឌមួយដែលអាមេរិកព្រាងឡើងនេះ ដើម្បីបញ្ចប់សង្រ្គាមជាមួយរុស្ស៊ី ដោយក្នុងនោះ ស្នើឱ្យទីក្រុងគីវ បោះបង់ទឹកដី និងសព្វាវុធមួយចំនួន។ ក្នុងផែនការសន្តិភាព ២៨ចំណុចនេះ សារព័ត៌មាន Axios និយាយថា អ៊ុយក្រែន និងអឺរ៉ុប នឹងទទួលបានការធានាសន្តិសុខរបស់អាមេរិក ជាថ្នូរឱ្យទីក្រុងគីវ ប្រគល់ផ្នែកភាគខាងកើតអ៊ុយក្រែនទៅឱ្យរុស្ស៊ី ដែលបច្ចុប្បន្ន ទីក្រុងមូស្គូ មិនមានការគ្រប់គ្រងឡើយ។

អ្នកនាំពាក្យវិមានក្រឹមឡាំង លោក Dmitry Peskov នៅតែទទូចថា ពុំមានការវិវត្តថ្មីឡើយ ចាប់តាំងកិច្ចប្រជុំកំពូលខែសីហា រវាងប្រធានាធិបតីរុស្ស៊ី Vladimir Putin និងប្រធានាធិបតីអាមេរិក Donald Trump មក។ នៅពេលត្រូវសាកសួរថាតើមានអ្នកសង្ខេបប្រាប់លោក Putin ពី "ផែនការសន្តិភាព ២៨ចំណុច" នេះឬទេ លោក Peskov បដិសេធមិនឆ្លើយតបឡើយ ដោយគ្រាន់តែនិយាយថា "ដំណោះស្រាយមួយត្រូវតែនាំទៅរកការលុបបំបាត់មូលហេតុនៃជម្លោះនេះ"។

គួរឱ្យដឹងថា លោក Putin ពិពណ៌នាសង្រ្គាមនេះថាជា ការផ្លាស់ប្តូរជាប្រវត្តិសាស្ត្រ ក្នុងទំនាក់ទំនងរុស្ស៊ី ជាមួយលោកខាងលិច ដែលលោកនិយាយថា ធ្វើឱ្យរុស្ស៊ីអាម៉ាស់មុខ បន្ទាប់ពីការដួលរលំសហភាពសូវៀតឆ្នាំ១៩៩១ ដោយការពង្រីកអង្គការណាតូ និងទន្រ្ទានលើអ្វីដែលលោកចាត់ទុកជាផ្នែកនៃឥទ្ធិពលរបស់រុស្ស៊ី រួមទាំងអ៊ុយក្រែន និងហ្សកហ្ស៊ី។ លោក Putin ទាមទារឱ្យអ៊ុយក្រែន បោះបង់មហិច្ឆិតាចូលរួមជាមួយណាតូ ប្រកាសខ្លួនជាប្រទេសអព្យាក្រឹត និងដាក់កំហិតកងកម្លាំងប្រដាប់អាវុធរបស់ខ្លួន៕