ក្រសួងការបរទេសរបស់ខ្លួន បានប្រកាសនៅថ្ងៃសុក្រនេះថា សិង្ហបុរី នឹងដាក់ទណ្ឌកម្មហិរញ្ញវត្ថុលើជនជាតិអ៊ីស្រាអែលចំនួន ៤នាក់ និងហាមឃាត់ពួកគេ មិនឲ្យចូលទៅប្រទេសដែលមានឈ្មោះដូចទីក្រុងនេះ ដោយចោទប្រកាន់ពួកគេពីបទប្រព្រឹត្ត«អំពើហិង្សាដ៏ធ្ងន់ធ្ងរ»ប្រឆាំងនឹងប្រជាជនប៉ាឡេស្ទីន នៅតំបន់វេសបែង(West Bank)។

ក្រសួងបាននិយាយថា សកម្មភាពដែលបានប្រព្រឹត្តនៅក្នុងតំបន់វេសបែង ដោយលោក Meir Mordechai Ettinger លោក Elisha Yered លោក Ben-Zion Gopstein និង លោក Baruch Marzel គឺខុសច្បាប់ និងបានធ្វើឲ្យប៉ះពាល់ដល់លទ្ធភាពនៃដំណោះស្រាយរដ្ឋពីរ នៅប៉ាឡេស្ទីន។

ក្រសួងបានបញ្ជាក់ថា៖«ក្នុងនាមជាអ្នកគាំទ្រយ៉ាងមុតមាំចំពោះច្បាប់អន្តរជាតិ និងដំណោះស្រាយរដ្ឋពីរ សិង្ហបុរីប្រឆាំងនឹងការប៉ុនប៉ងឯកតោភាគីណាមួយ ដើម្បីផ្លាស់ប្តូរការពិតនៅលើទឹកដីនេះ តាមរយៈសកម្មភាពដែលខុសច្បាប់ ក្រោមច្បាប់អន្តរជាតិ»។

បុគ្គលទាំង៤រូបនេះ ធ្លាប់ត្រូវបានដាក់ទណ្ឌកម្ម ដោយសហភាពអឺរ៉ុបពីមុនមកហើយ។

រដ្ឋមន្ត្រីការបរទេស លោក Vivian Balakrishnan បានប្រកាសនៅក្នុងសភាកាលពីខែកញ្ញាថា មេដឹកនាំនៃក្រុមអ្នកតាំងលំនៅអ៊ីស្រាអែល នឹងត្រូវរងការដាក់ទណ្ឌកម្ម៕