នគរបាល បានប្រាប់ឲ្យដឹងថា ឡចំហាយ ក្នុងរោងចក្រផលិតកាវមួយកន្លែង នៅភាគខាងកើតនៃប្រទេសប៉ាគីស្ថាន បានផ្ទុះ នៅថ្ងៃសុក្រ (ទី២១ ខែវិច្ឆិកា) នេះ ដោយបានបណ្ដាលឲ្យកម្មករយ៉ាងតិច ១៥នាក់ស្លាប់ និង ៧នាក់ផ្សេងទៀតរងរបួស។

អ្នកគ្រប់គ្រងតំបន់ លោក Raja Jahangir បាននិយាយថា ការផ្ទុះនេះបានកើតឡើងនៅរោងចក្រឧស្សាហកម្ម ក្នុងទីក្រុង Faisalabad របស់ខេត្ត Punjab។ លោកបានបញ្ជាក់ទៀតថា មូលហេតុនៃការផ្ទុះនេះ មិនទាន់ដឹងច្បាស់នៅឡើយទេ ហើយកំពុងស្ថិតក្រោមការស៊ើបអង្កេត។

លោក Jahangir បាននិយាយថា ការផ្ទុះនេះបានធ្វើឲ្យខូចខាតយ៉ាងធ្ងន់ធ្ងរដល់អគាររោងចក្រ និងបានធ្វើឲ្យមានការភ័យស្លន់ស្លោពេញតំបន់នោះ។ ហើយលោកបានឲ្យដឹងបន្ថែមថា រោងចក្រក៏ត្រូវបានអគ្គិភ័យឆាបឆេះភ្លាមៗ បន្ទាប់ពីមានការផ្ទុះនោះ។

គួរបញ្ជាក់ថា ស្តង់ដារសុវត្ថិភាពមិនសូវល្អ គឺជាមូលហេតុនៃគ្រោះថ្នាក់ឧស្សាហកម្ម និងអគ្គិភ័យឆាបឆេះរោងចក្រដែលកើតឡើងជាញឹកញាប់នៅក្នុងប្រទេសប៉ាគីស្ថាន។ ក្នុងឆ្នាំ២០២៤ កម្មកររាប់សិបនាក់ បានរងរបួស ក្នុងអំឡុងពេលមានការផ្ទុះឡចំហាយស្រដៀងគ្នានេះ នៅរោងម៉ាស៊ីនវាយនភ័ណ្ឌ ក្នុងទីក្រុង Faisalabad។ ហើយកាលពីសប្តាហ៍មុនផងដែរ ការផ្ទុះនៅរោងចក្រផាវមួយកន្លែង ក្នុងទីក្រុងកំពង់ផែ Karachi របស់ប្រទេសប៉ាគីស្ថាននេះ បានបណ្ដាលឲ្យមនុស្ស ៤នាក់បាត់បង់ជីវិត៕