យន្តហោះចម្បាំងឥណ្ឌា ១គ្រឿង បានធ្លាក់ក្នុងអំឡុងពេលហោះសម្ដែង ក្នុងកម្មវិធីពិព័រណ៍ Dubai Airshow នៅប្រទេសអារ៉ាប់រួម នាថ្ងៃសុក្រ (ទី២១ ខែវិច្ឆិកា) នេះ ដោយអ្នកបើកយន្តហោះបានបាត់បង់ជីវិត។

ការិយាល័យប្រព័ន្ធផ្សព្វផ្សាយរដ្ឋរបស់ទីក្រុងឌូបៃ បានបង្ហោះនៅលើបណ្ដាញសង្គម X ថា៖ «យន្តហោះចម្បាំង Tejas មកពីប្រទេសឥណ្ឌា ដែលចូលរួមក្នុងការហោះហើរសម្ដែងនាថ្ងៃនេះ នៅឯកម្មវិធី Dubai Airshow បានធ្លាក់ ដែលបណ្តាលឲ្យអ្នកបើកយន្តហោះស្លាប់ដ៏គួរឲ្យសោកសៅ»។

យន្តហោះចម្បាំងឥណ្ឌា HAL Tejas ដែលត្រូវបានប្រើក្នុងកងទ័ពអាកាសឥណ្ឌា បានធ្លាក់នៅវេលាម៉ោង ២ និង ១០នាទីរសៀល (ម៉ោងក្នុងស្រុក) ពេលកំពុងហោះសម្ដែងឲ្យហ្វូងមនុស្សទស្សនា។

ផ្សែងខ្មៅបានហុយទ្រលោមពេញអាកាសយានដ្ឋានអន្តរជាតិ Al Maktoum នៅឯមជ្ឈមណ្ឌល Dubai World Central ខណៈដែលហ្វូងអ្នកទស្សនា បានមើលឃើញ ហើយសំឡេងស៊ីរ៉ែន បានបន្លឺឡើង បន្ទាប់ពីមានការធ្លាក់នោះ៕