កោះតៃវ៉ាន់ បានដកចេញវិធានការរឹតត្បិតទាំងអស់លើការនាំចូលអាហាររបស់ប្រទេសជប៉ុនកាលពីថ្ងៃសុក្រ ទី ២១ ខែវិច្ឆិកា ក្នុងការបង្ហាញការគាំទ្រមួយទៀតចំពោះទីក្រុងតូក្យូ បន្ទាប់ពីមានរបាយការណ៍ថា ចិននឹងបញ្ឈប់ការទិញដោយសារតែជម្លោះជាមួយនាយករដ្ឋមន្ត្រីជប៉ុនថ្មី។

រដ្ឋាភិបាលនៅទីក្រុងតៃប៉ិ បានដាក់បម្រាមទាំងស្រុងលើការនាំចូលអាហារពីតំបន់របស់ប្រទេសជប៉ុនចំនួនប្រាំនៅក្នុងនិងជុំវិញទីតាំងមានគ្រោះមហន្តរាយនុយក្លេអ៊ែរ Fukushima ឆ្នាំ២០១១ ដែលបណ្តាលមកពីការរញ្ជួយដីនិងរលកយក្សស៊ូណាមិដ៏ធំ មុនពេលបន្ធូរបន្ថយការរឹតត្បិតមួយចំនួនកាលពីឆ្នាំ ២០២២ និងឆ្នាំ២០២៤។

រដ្ឋបាលចំណីអាហារនិងឱសថរបស់កោះតៃវ៉ាន់បាននិយាយកាលពីថ្ងៃសុក្រថា «វិធានការគ្រប់គ្រងសុវត្ថិភាពអាហាររបស់ប្រទេសជប៉ុនបានវិលមករកភាពប្រក្រតីវិញ» ដោយបានចូលជាធរមានភ្លាមៗ។ រដ្ឋបាលនេះបាននិយាយនៅក្នុងសេចក្តីថ្លែងការណ៍ថា «ចាប់តាំងពីឆ្នាំ២០១១មក កោះតៃវ៉ាន់បានធ្វើការត្រួតពិនិត្យព្រំដែនលើផលិតផលអាហាររបស់ប្រទេសជប៉ុនសម្រាប់ការធ្វើតេស្តវិទ្យុសកម្ម។

ការប្រកាសរបស់កោះតៃវ៉ាន់ ធ្វើឡើងបន្ទាប់ពីជម្លោះរវាងប្រទេសជប៉ុននិងចិន បង្កឡើងដោយការថ្លែងសុន្ទរកថារបស់នាយករដ្ឋមន្ត្រីជប៉ុនថ្មី លោកស្រី Sanae Takaichi ក្នុងខែនេះថា ទីក្រុងតូក្យូអាចធ្វើអន្តរាគមន៍ដោយយោធាក្នុងការវាយប្រហារណាមួយលើកោះស្វ័យគ្រប់គ្រងមួយនេះ។

ប្រទេសចិនអះអាងថា កោះតៃវ៉ាន់គ្រប់គ្រងតាមបែបប្រជាធិបតេយ្យជាផ្នែកមួយនៃទឹកដីរបស់ខ្លួន ហើយបានគំរាមកំហែងប្រើកម្លាំងដើម្បីក្រសោបយកកោះស្វ័យគ្រប់គ្រងមួយនេះឲ្យស្ថិតនៅក្រោមការគ្រប់គ្រងរបស់ខ្លួន។