ការអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) នឹង​ផ្តល់​ជំនាញ​ដល់​អ្នក​ជំនាន់​ក្រោយ​របស់​កម្ពុជា ដើម្បីធ្វើការនៅក្នុងឧស្សាហកម្មដែលកំពុងរីកចម្រើន ដូចជា ឧស្សាហកម្មយានយន្ត ថាមពល​ស្អាត ការផលិតឧបករណ៍ទំនើប ការកែច្នៃកសិកម្ម អេឡិចត្រូនិច និងព័ត៌មានវិទ្យា។

វិទ្យាស្ថាន Bendigo Kangan Institute (BKI) នៃប្រទេសអូស្ត្រាលី សហការជាមួយ ក្រសួង​ការងារ​ និងបណ្តុះបណ្តាលវិជ្ជាជីវៈ (MLVT) និងក្រុមហ៊ុន RMA Cambodia បាន​បង្កើត​មជ្ឈ​មណ្ឌល​ឧត្តមភាពយានយន្តកម្ពុជា ដែលជាវិទ្យាស្ថាន TVET ស្តង់ដារអន្តរជាតិ ដើម្បីបណ្តុះ​បណ្តាល​ជំនាញដល់ប្រជាជនកម្ពុជាក្លាយជាអ្នកជំនាញផ្នែកយានយន្ត មេកានិច និងជួស​ជុល​ដែល​មាន​សមត្ថភាពខ្ពស់។ 

ជំនាញទាំងនេះមានសារៈសំខាន់ក្នុងការកសាងកម្លាំងពលកម្មជំនាញដែលមានសមត្ថភាពខ្ពស់សម្រាប់វិស័យផលិតយានយន្ត និងការដាក់ឱ្យដំណើរការរថយន្តអគ្គិសនី។ វិទ្យាស្ថាន BKI កំពុង​ធ្វើ​ការ​ដើម្បី​ធានាថា គំរូ TVET ឈានមុខគេលំដាប់ពិភពលោករបស់អូស្ត្រាលីអាចផ្ទេរ និងអនុវត្ត​បាន​នៅ​កម្ពុជា។

នៅថ្ងៃទី ២១ ខែវិច្ឆិកា លោកឯកអគ្គរដ្ឋទូត យីប បានអញ្ជើញចូលរួមជាមួយ ឯកឧត្តម ហេង សួរ រដ្ឋមន្ត្រី​ក្រសួងការងារ និងបណ្តុះបណ្តាលវិជ្ជាជីវៈ ក៏ដូចជាតំណាងពីវិទ្យាស្ថាន BKI និងក្រុមហ៊ុន RMA ដើម្បីចូលរួមពិធីសម្ពោធសាកល្បងមជ្ឈមណ្ឌលនេះ។

នេះ​ជា​ឧទាហរណ៍ដ៏អស្ចារ្យមួយទៀតបង្ហាញពីកិច្ចសហប្រតិបត្តិការអូស្ត្រាលី-កម្ពុជា ក្នុងវិ​ស័យ​អប់រំ ​ដែលរួមចំណែកបង្កើតអនាគតភ្លឺស្វាងសម្រាប់កម្ពុជា៕