លោកប្រធានាធិបតី រ៉េសិប តាយីប អឺដូហ្កាន់ (Recep Tayyip Erdogan) បាននិយាយថា ប្រទេសទួរគី កំពុងវាយតម្លៃពីរបៀបដាក់ពង្រាយកងកម្លាំងសន្តិសុខរបស់ខ្លួន ទៅកាន់កម្លាំងរក្សាស្ថិរភាពអន្តរជាតិដែលកំពុងត្រូវបានគ្រោងទុកសម្រាប់តំបន់ហ្កហ្សា ដោយបន្ថែមថា ការសម្រេចចិត្ត នឹងត្រូវបានធ្វើឡើងបន្ទាប់ពីការពិភាក្សាទាំងនេះ។

ប្រទេសទួរគីដែលជាសមាជិកអង្គការណាតូ បានដើរតួនាទីយ៉ាងសំខាន់ក្នុងការចរចាសម្រាប់បទឈប់បាញ់នៅតំបន់ហ្កាហ្សា ដោយក្លាយជាប្រទេសចុះហត្ថលេខាមួយក្នុងកិច្ចព្រមព្រៀង ដែលបានចុះហត្ថលេខា នៅប្រទេសអេហ្ស៊ីប។ ប្រទេសនេះ បានសន្យាថា នឹងតាមដានការអនុវត្តរបស់ខ្លួន និងបានសម្តែងបំណងប្រាថ្នាចង់ចូលរួមជាមួយកម្លាំងរក្សាស្ថិរភាពដែលបានគ្រោងទុកនេះ។

ថ្លែងនៅក្នុងសន្និសីទសារព័ត៌មានមួយកាលពីថ្ងៃអាទិត្យ បន្ទាប់ពីកិច្ចប្រជុំកំពូល G20 នៅអាហ្វ្រិកខាងត្បូង លោក អឺដូហ្កាន់ បានបញ្ជាក់ម្តងទៀតនូវទស្សនៈរបស់លោកថា ការវាយប្រហារនៅតំបន់ហ្កាហ្សា គឺស្មើនឹង «អំពើប្រល័យពូជសាសន៍» ហើយថា នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ទទួលខុសត្រូវចំពោះបញ្ហាទាំងនេះ។ អ៊ីស្រាអែលបដិសេធការចោទប្រកាន់ពីបទប្រល័យពូជសាសន៍៕