យោងតាមសេចក្តីរាយការណ៍របស់ប្រព័ន្ធផ្សព្វផ្សាយបានឲ្យដឹងថា អ្នកបំផ្ទុះគ្រាប់បែកអត្តឃាតបីនាក់បានវាយប្រហារទីបញ្ជាការកណ្តាលនៃកងកម្លាំងយោធាប៉ារ៉ាក្នុងទីក្រុង Peshawar ប្រទេសប៉ាគីស្ថាន ដោយបានសម្លាប់បុគ្គលិកសន្តិសុខយ៉ាងហោចណាស់បីនាក់ និងរងរបួសជាច្រើននាក់ផ្សេងទៀត។

សារព័ត៌មានប្រចាំថ្ងៃ Dawn បានរាយការណ៍ថា ការវាយប្រហារលើទីបញ្ជាការកណ្តាលរបស់នគរបាលសហព័ន្ធ (FC) បានកើតឡើងនៅព្រឹកព្រលឹមថ្ងៃចន្ទនេះ ដោយអ្នកវាយប្រហារម្នាក់បានបំផ្ទុះគ្រឿងផ្ទុះ នៅច្រកទ្វារចូលទៅកាន់បរិវេណ។ របាយការណ៍បានឲ្យដឹងថា មនុស្សពីរនាក់ផ្សេងទៀតបានព្យាយាមបង្ខំចូលទៅក្នុងនោះ ប៉ុន្តែត្រូវបានបាញ់សម្លាប់។

លោក Mian Saeed Ahmad មន្ត្រីនគរបាលទីក្រុង Peshawar បាននិយាយថា «ដំបូងឡើយ ក្រុមសកម្មប្រយុទ្ធបីនាក់បានព្យាយាមវាយប្រហារទីបញ្ជាការកណ្តាល» ហើយ«អ្នកបំផ្ទុះគ្រាប់បែកម្នាក់បានបំផ្ទុះខ្លួនឯងនៅច្រកទ្វារ ខណៈពីរនាក់ទៀតបានព្យាយាមចូលទៅក្នុងបរិវេណនោះ ប៉ុន្តែត្រូវបានបាញ់សម្លាប់ដោយបុគ្គលិកនគរបាលសហព័ន្ធ»។

មន្ត្រីសន្តិសុខបាននិយាយថា តំបន់នេះត្រូវបានបិទ ហើយបុគ្គលិកអនុវត្តច្បាប់ រួមមានកងទ័ព និងនគរបាល បានហ៊ុមព័ទ្ធតំបន់នោះ ហើយកំពុងដោះស្រាយស្ថានការណ៍ដោយប្រុងប្រយ័ត្ន ព្រោះមានការសង្ស័យថាមានភេរវករមួយចំនួនទៀតនៅខាងក្នុងទីបញ្ជាការកណ្តាល»។