កាលពីថ្ងៃសុក្រសប្ដាហ៍មុន ប្រធានាធិបតីអាមេរិក លោក Donald Trump បានកំណត់ថ្ងៃទី២៧ ខែវិច្ឆិកា ជាឱសានវាទសម្រាប់ទីក្រុងគីវ ឱ្យទទួលយកផែនការសន្តិភាព ២៨ចំណុច ដែលស្នើឡើងដោយរដ្ឋបាលរបស់លោក ដើម្បីបញ្ចប់ជម្លោះរុស្ស៊ី-អ៊ុយក្រែន។ ក្រោយមក នៅថ្ងៃអាទិត្យ (២៣ វិច្ឆិកា) មន្រ្តីអាមេរិក និងអ៊ុយក្រែន បានជួបប្រជុំគ្នានៅទីក្រុងហ្សឺណែវ ដើម្បីពិភាក្សាសំណើនេះ ហើយភាគីទាំងពីរបញ្ជាក់ពីវឌ្ឈនភាពខ្ពស់ ដោយប្ដេជ្ញាបង្កើនល្បឿនធ្វើការទៅមុខទៀត។

ថ្លែងប្រាប់វិទ្យុ Fox News លោក Trump បាននិយាយថា "រូបលោកមានពេលវេលាកំណត់ជាច្រើន ប៉ុន្តែប្រសិនបើអ្វីៗដំណើរការទៅល្អ នោះពេលកំណត់ក៏នឹងអាចពន្យារបានដែរ ប៉ុន្តែថ្ងៃព្រហស្បតិ៍ (២៧ វិច្ឆិកា) គឺជាពេលវេលាដ៏សមរម្យមួយ"។ លោកបន្តថា អ៊ុយក្រែនបាត់បង់ទឹកដីហើយ ហើយ "អាចនឹងចាញ់ក្នុងពេលដ៏ខ្លី"។

ក្នុងសុន្ទរកថាទៅកាន់ប្រទេសជាតិ ប្រធានាធិបតីអ៊ុយក្រែន Volodymyr Zelenskyy បាននិយាយថា "ឥឡូវនេះ អ៊ុយក្រែនប្រឈមជម្រើសដ៏លំបាកនោះគឺ ការបាត់បង់សេចក្តីថ្លៃថ្នូរ ឬហានិភ័យនៃការបាត់បង់ដៃគូដ៏សំខាន់ នោះជាជម្រើសដ៏លំបាក ២៨ចំណុច ឬរដូវរងាដ៏លំបាកបំផុត"។ ថ្ងៃកំណត់នេះជាសញ្ញាបង្ហាញថា សេតវិមានកាន់តែអស់ភាពអត់ធ្មត់ហើយលើជម្លោះជាច្រើនឆ្នាំមកនេះ។ 

កាលពីសប្ដាហ៍មុន លោកប្រធានាធិបតីរុស្ស៊ី Vladimir Putin ក៏និយាយថា រុស្ស៊ីត្រៀមខ្លួនរួចជាស្រេចសម្រាប់កិច្ចពិភាក្សាលម្អិតនៃផែនការសន្តិភាព ២៨ចំណុចថ្មី ដែលស្នើឡើងដោយអាមេរិក ស្តីពីអ៊ុយក្រែន។ លោក Putin បន្តថា រុស្ស៊ីបានទទួលផែនការនេះ តាមបណ្តាញទំនាក់ទំនងមានស្រាប់ ជាមួយរដ្ឋបាលអាមេរិក ហើយសំណើនេះអាចជាមូលដ្ឋាននៃដំណោះស្រាយសន្តិភាពចុងក្រោយ ប៉ុន្តែសេចក្ដីព្រាងនោះមិនទាន់ត្រូវពិភាក្សាឱ្យបានលម្អិតជាមួយរុស្ស៊ី នោះទេ៕