ការប្រយុទ្ធនៅជួរមុខដ៏ក្ដៅគគុករវាងភាគីជម្លោះរុស្ស៊ី និងអ៊ុយក្រែន នៅតែតានតឹងខ្លាំងក្នុងសង្រ្គាមជិត ៤ឆ្នាំមកនេះ ដោយភាគីរុស្ស៊ី បាននិយាយអះអាងកាលពីថ្ងៃអាទិត្យ (២៣ វិច្ឆិកា) ថា កម្លាំងរបស់ខ្លួនបានវាយដណ្តើមបានទីតាំងឈរជើងចំនួន៣ បន្ថែមទៀតនៅភាគខាងកើតអ៊ុយក្រែន ខណៈខាងអ៊ុយក្រែនវិញ នៅថ្ងៃដដែលនោះ បានរាយការណ៍ពីការប្រយុទ្ធ ១៦២កន្លែងនៅក្នុងសមរភូមិ។

ក្រសួងការពារជាតិរុស្ស៊ី បាននិយាយក្នុងរបាយការណ៍ចុងក្រោយរបស់ខ្លួនថា ក្នុងពេល ២៤ម៉ោងកន្លងទៅនោះ កងកម្លាំងរុស្ស៊ី បានវាយប្រហារលើគោលដៅអ៊ុយក្រែនក្នុង ១៤៨តំបន់ និងគ្រប់គ្រងបានទីតាំងទីលំនៅចំនួន៣ ដូចជាភូមិ Petrovskoye នៅតំបន់ Donetsk ព្រមទាំងភូមិ Tikhoye និងភូមិ Otradnoye ក្នុងតំបន់ Dnepropetrovsk។

ទីក្រុងគីវ កំពុងព្យាយាមរក្សាជំហរក្នុងបន្ទាយសំខាន់ៗនៅភាគខាងកើត ជាទីដែលទាហានរុស្ស៊ី កំពុងវាយដណ្តើមជាបន្តបន្ទាប់។ ក្នុងរបាយការណ៍របស់ខ្លួនកាលពីថ្ងៃអាទិត្យ នាយសេនាធិការនៃកងកម្លាំងប្រដាប់អាវុធអ៊ុយក្រែន មិនបានលើកពីភូមិទាំង៣នោះទេ ដោយគ្រាន់តែរាយការណ៍ថា មានការប៉ះទង្គិចសរុប ១៦២ទីតាំង រវាងកងកម្លាំងរុស្ស៊ី និងអ៊ុយក្រែន ក្នុងពេល ២៤ម៉ោងកន្លងទៅ។

ការមានប្រៀបចុងក្រោយបង្អស់របស់រុស្ស៊ី និងការប្រយុទ្ធដ៏ខ្លាំងក្លានេះ បានកើតឡើងស្របពេលពិភាក្សាកំពុងតែបង្កើនល្បឿនលើផែនការសន្តិភាពអ៊ុយក្រែន របស់លោកប្រធានាធិបតីអាមេរិក Donald Trump ដើម្បីបញ្ចប់សង្រ្គាមដ៏បង្ហូរឈាមមួយនេះ៕