ប្រេស៊ីល៖ ចំនួនអ្នកស្លាប់ដោយសារទឹកជំនន់ និងបំណាក់ដីដែលបានបំផ្លាញទីក្រុង Petropolis ប្រទេសប្រេស៊ីលបានកើនឡើងដល់យ៉ាងហោចណាស់ ១១៧នាក់ ហើយក្រុមមន្ត្រីក្នុងតំបន់និយាយថា ចំនួនអ្នកស្លាប់នឹងកើនឡើងថែមទៀត ខណៈមនុស្សច្រើនជាង ១១៦នាក់ទៀតនៅមិនទាន់រកឃើញនៅឡើយ។
រដ្ឋាភិបាលរដ្ឋ Rio de Janeiro បានបញ្ជាក់អំពីការកើនឡើងចំនួនអ្នកស្លាប់ ជាច្រើនម៉ោងបន្ទាប់ពីនគរបាលក្នុងតំបន់បានប្រកាសថា មនុស្ស ១៣៤នាក់បាត់ខ្លួនដែលភាគច្រើនត្រូវបានគេជឿថាកប់នៅក្នុងដីល្បាប់។ ជំនន់ទឹកភ្លៀង និងបំណាក់ដីបាននាំយករថយន្ត និងលំនៅឋានហូរទៅតាមទឹកនៅលើដងផ្លូវនានាក្នុងទីក្រុង អំឡុងពេលមានភ្លៀងធ្លាក់ខ្លាំងបំផុតមិនដែលធ្លាប់មានក្នុងរយៈពេល ជាច្រើនទសវត្សរ៍កន្លងទៅនេះ។ អ្នកនៅរស់រានមានជីវិតពីគ្រោះមហន្តរាយ បានជីកកកាយស្វែងរកមនុស្សជាទីស្រលាញ់របស់ពួកគេ ទោះបីជាមានការបាក់ដីកាន់តែច្រើនឡើងនៅលើជម្រាលភ្នំនៅទីក្រុងនេះក៏ដោយ។
ការបាក់ដីកាលពីថ្ងៃព្រហស្បតិ៍បានជំរុញឱ្យមានការជម្លៀសប្រជាជនចេញ ប៉ុន្តែមិនបណ្តាលឱ្យមានការរងរបួសនោះទេ។ នគរបាលទីក្រុង Rio បាននិយាយនៅក្នុងសេចក្តីថ្លែងការណ៍ថា ភ្នាក់ងារប្រមាណ ២០០នាក់កំពុងពិនិត្យបញ្ជីឈ្មោះអ្នកនៅរស់ អ្នកស្លាប់ និងអ្នកបាត់ខ្លួន ដោយទៅមើលនៅតាមប៉ុស្តិ៍ត្រួតពិនិត្យ និងទីជម្រក និងកន្លែងបញ្ចុះសពនៅក្នុងទីក្រុងនេះ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
