អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេសកាលពីថ្ងៃចន្ទ បានអំពាវនាវឲ្យមានបទឈប់បាញ់ជាបន្ទាន់ និងឲ្យទាំងយោធា និងកងកម្លាំងគាំទ្ររហ័ស (RSF) ចរចារកដំណោះស្រាយ មួយ។

ដោយសរសេរនៅលើបណ្តាញសង្គម X លោកក៏បានអំពាវនាវឲ្យមាន «ការផ្តល់ជំនួយមនុស្សធម៌ដោយសុវត្ថិភាព និងគ្មានការរារាំង» ក៏ដូចជាការបញ្ចប់ការបញ្ជូនអាវុធ និងយុទ្ធជនទៅកាន់ស៊ូដង់។

លោក ហ្គុយតឺរេស បានសង្កត់ធ្ងន់ថា៖«យើងត្រូវការសន្តិភាពនៅប្រទេសស៊ូដង់»។

ការអំពាវនាវនេះ បានកើតឡើង នៅពេលដែលឧត្តមសេនីយ៍ជាន់ខ្ពស់របស់ប្រទេសនេះ បានបដិសេធសំណើបទឈប់បាញ់ដែលផ្តល់ដោយអ្នកសម្របសម្រួលដឹកនាំដោយអាមេរិកថា«អាក្រក់បំផុត»។

នៅក្នុងអត្ថាធិប្បាយតាមវីដេអូដែលចេញផ្សាយដោយយោធា លោកឧត្តមសេនីយ៍ អាប់ដែលហ្វាតា អាល់ ប៊ូហាន (Abdel-Fattah Al-Burhan) បាននិយាយថា សំណើនេះ មិនអាចទទួលយកបានទេ ដោយចោទប្រកាន់អ្នកសម្របសម្រួលថា «មានភាពលម្អៀង» ក្នុងកិច្ចខិតខំប្រឹងប្រែងរបស់ពួកគេ ដើម្បីបញ្ចប់           សង្គ្រាម។

ប្រទេសស៊ូដង់ បានធ្លាក់ចូលទៅក្នុងភាពវឹកវរ នៅក្នុងខែមេសា ឆ្នាំ ២០២៣ នៅពេលដែលការតស៊ូ            ដណ្តើមអំណាចរវាងយោធា និងកងកម្លាំងគាំទ្ររហ័ស (RSF)បានផ្ទុះឡើងទៅជាការប្រយុទ្ធគ្នាដោយបើកចំហនៅក្នុងរដ្ឋធានីខាទុំ និងកន្លែងផ្សេងទៀតនៃប្រទេសនេះ។

យោងតាមតួលេខរបស់អង្គការសហប្រជាជាតិ សង្គ្រាមដ៏បំផ្លិចបំផ្លាញ បានសម្លាប់មនុស្សជាង ៤០.០០០នាក់ ប៉ុន្តែក្រុមជំនួយ និយាយថា តួលេខនេះ គឺរាប់មិនអស់ទេ ហើយចំនួនពិតប្រាកដ អាចខ្ពស់ជាងនេះច្រើនដងទៅទៀត៕