ក្រុមហ៊ុនប្រេងឥន្ធនៈស៊ីរី បានប្រកាសពីការមកដល់នៃការដឹកជញ្ជូនប្រេងលើកទី២ និងចុងក្រោយ ក្រោមកិច្ចព្រមព្រៀងជំនួយឥតសំណងរវាងប្រទេសអារ៉ាប៊ីសាអ៊ូឌីត និងស៊ីរី ដែលមានគោលបំណងគាំទ្រដល់ វិស័យថាមពល ដែលកំពុងជួបការលំបាករបស់ប្រទេសមួយនេះ។

លោក Ahmad Qabahjee អនុប្រធានប្រតិបត្តិរបស់ក្រុមហ៊ុនប្រេងឥន្ធនៈស៊ីរី បាននិយាយថា នាវាដឹកប្រេង Reliable Warrior របស់អារ៉ាប៊ីសាអ៊ូឌីត បានមកដល់កំពង់ផែ Baniyas ក្នុងសាធារណរដ្ឋអារ៉ាប់ស៊ីរី កាលពីថ្ងៃចន្ទ។

លោកបានបន្ថែមថា៖«នេះគឺជាកញ្ចប់ចុងក្រោយនៃជំនួយឥតសំណងប្រេងរបស់អារ៉ាប៊ីសាអ៊ូឌីត ដែលមានចំនួនសរុប ១ លានបារ៉ែល។ ជំនួយនេះ នឹងដើរតួនាទីយ៉ាងសំខាន់ក្នុងការបំពេញតម្រូវការថាមពលរបស់ប្រទេសស៊ីរី»។

ទីភ្នាក់ងារសារព័ត៌មានអារ៉ាប់ស៊ីរី SANA បានរាយការណ៍ថា ការដឹកជញ្ជូននេះ បានកើតឡើង បន្ទាប់ពីការដឹកជញ្ជូនមុនចំនួន ៦៥០.000 បារ៉ែល ក្នុងខែវិច្ឆិកា។ ជំនួយឥតសំណងរបស់អារ៉ាប៊ីសាអ៊ូឌីត មានគោលបំណងដោះស្រាយកង្វះខាតអគ្គិសនី ដែលកំពុងបន្តនៅក្នុងប្រទេសស៊ីរី និងបង្កើនហេដ្ឋារចនាសម្ព័ន្ធថាមពលរបស់ប្រទេសនេះ។

សារព័ត៌មាន SANA បានបន្ថែមថា ប្រេងឆៅនេះ នឹងត្រូវចម្រាញ់ ដើម្បីផ្តល់ឥន្ធនៈសម្រាប់រោងចក្រថាមពល ដើម្បីកែលម្អការផ្គត់ផ្គង់អគ្គិសនីសម្រាប់ប្រជាជន និងឧស្សាហកម្មសំខាន់ៗ។ ជំនួយឥតសំណងនេះ ក៏មានគោលបំណងជំរុញភាពអាចរកបាននៃផលិតផលប្រេងសំខាន់ៗ ដូចជាប្រេងម៉ាស៊ូត និងប្រេងសាំង និងគាំទ្រដល់វិស័យឧស្សាហកម្ម និងកសិកម្មរបស់ប្រទេសស៊ីរី៕