ប្រភពពីមន្រ្តីអាមេរិកមួយរូបបានប្រាប់សារព័ត៌មានរ៉យទ័រថា មន្ត្រីជាន់ខ្ពស់ក្នុងជួរកងទ័ពអាមេរិក លោក Dan Driscoll បានជួបពិភាក្សាជាមួយក្រុមមន្ត្រីរុស្ស៊ី ក្នុងទីក្រុងអាប៊ូដាប៊ី របស់អារ៉ាប់រួម កាលពីថ្ងៃចន្ទ (២៤ វិច្ឆិកា) ដែលជាកិច្ចខិតខំប្រឹងប្រែងចុងក្រោយរបស់រដ្ឋបាលលោកប្រធានាធិបតី Donald Trump ក្នុងការសម្របសម្រួលកិច្ចព្រមព្រៀងសន្តិភាពរវាងរុស្ស៊ី និងអ៊ុយក្រែន។

ជំនួបដែលពុំមានការប្រកាសនេះកើតឡើងបន្ទាប់ពីមន្ត្រីអាមេរិក និងអ៊ុយក្រែន បានស្វះស្វែងដោះស្រាយការខ្វែងគំនិត ជុំវិញផែនការបញ្ចប់សង្រ្គាមនៅអ៊ុយក្រែន ដោយយល់ព្រមកែប្រែសំណើរបស់អាមេរិក ដែលទីក្រុងគីវ និងសម្ព័ន្ធមិត្តអឺរ៉ុប មើលឃើញថាជាបញ្ជីបំណងប្រាថ្នារបស់វិមានក្រឹមឡាំង។

មន្ត្រីអាមេរិក ដែលសុំមិនបញ្ចេញឈ្មោះរូបនេះ បាននិយាយថា កិច្ចពិភាក្សារបស់លោក Driscoll នឹងបន្តរហូតដល់ថ្ងៃអង្គារនេះ។ គេមិនច្បាស់ឡើងថា គណៈប្រតិភូរុស្ស៊ី គឺជាមន្រ្តីកម្រិតណា។ មន្ត្រីរូបនេះបានបន្ថែមថា លោក Driscoll ក៏នឹងជួបជាមួយមន្ត្រីអ៊ុយក្រែនផងដែរ ពេលនៅទីក្រុងអាប៊ូដាប៊ីនេះ។

សំណើសន្តិភាពចុងក្រោយបំផុតរបស់ទីក្រុងវ៉ាស៊ីនតោន -- ដែលជាផែនការ ២៨ចំណុច ប៉ុន្តែត្រូវរាយការណ៍ថាបង្រួមមកត្រឹម ១៩ចំណុចវិញនេះ -- បានធ្វើឱ្យមន្រ្តីជាច្រើនក្នុងរដ្ឋាភិបាលអាមេរិកផ្ទាល់ ក៏ដូចជាអ៊ុយក្រែន និងអឺរ៉ុប មានការផ្ញាក់ផ្អើលយ៉ាងខ្លាំង ហើយបានជំរុញឱ្យមានក្ដីបារម្ភថ្មីៗថា រដ្ឋបាលលោក Trump អាចមានឆន្ទៈក្នុងការរុញឱ្យអ៊ុយក្រែន ចុះហត្ថលេខាលើកិច្ចព្រមព្រៀងសន្តិភាព ដែលងាកទៅខាងទីក្រុងមូស្គូ៕