មេដឹកនាំអឺរ៉ុប និងអាហ្វ្រិក បានជួបប្រជុំគ្នានៅប្រទេសអង់ហ្គោឡាកាលពីថ្ងៃចន្ទ ទី២៤ ខែវិច្ឆិកា សម្រាប់កិច្ចប្រជុំកំពូលកម្រិតខ្ពស់មួយក្នុងគោលបំណងធ្វើឲ្យស៊ីជម្រៅកិច្ចសហប្រតិបត្តិការលើសកម្មភាពអាកាសធាតុ និងពហុភាគីនិយម។

លោក Antonio Guterres អគ្គលេខាធិការអង្គការសហប្រជាជាតិ (UN) បាននិយាយទៅកាន់កិច្ចប្រជុំកំពូលថា អឺរ៉ុបនិងអាហ្វ្រិក «ស្ថិតក្នុងទីតាំងដ៏ល្អក្នុងការក្លាយជាអ័ក្សកណ្តាលនៃពិភពលោកពហុប៉ូលថ្មី» ដោយជំរុញឱ្យមេដឹកនាំនានាចាប់យកឱកាសក្នុងធនធានកកើតឡើងវិញ និងរ៉ែសំខាន់ៗរបស់អាហ្វ្រិក។

ប្រធានាធិបតីប្រទេសអង់ហ្គោឡានិងជាប្រធានបច្ចុប្បន្ននៃសហភាពអាហ្វ្រិក (AU) លោក Joao Lourenço បានអំពាវនាវឱ្យមានទំនាក់ទំនងសេដ្ឋកិច្ច និងការវិនិយោគកាន់តែរឹងមាំនៅក្នុងឧស្សាហូបនីយកម្មរបស់អាហ្វ្រិក ខណៈប្រធានក្រុមប្រឹក្សាអឺរ៉ុប លោក Antonio Costa បានសង្កត់ធ្ងន់ថា «កិច្ចសហប្រតិបត្តិការពហុភាគីគឺមានសារៈសំខាន់ជាងពេលណាៗទាំងអស់» ដើម្បីកសាងអនាគតក្នុងសន្តិភាព និងចីរភាព។