មជ្ឈមណ្ឌលស្រាវជ្រាវភូគព្ភសាស្ត្រអាល្លឺម៉ង់ បានឲ្យដឹងថា រញ្ជួយដីកម្រិត ៥,៩រ៉ិចទ័រ បានកើតមាននៅម្ដុំភាគខាងត្បូងនៃប្រទេសហ្វីលីពីន នាថ្ងៃអង្គារ (ទី២៥ ខែវិច្ឆិកា) នេះ។

ការរញ្ជួយនេះ បានវាយប្រហារដែនទឹកនៅក្បែរកោះ Mindanao ភាគខាងត្បូងនៃប្រទេសតំបន់អាស៊ីអាគ្នេយ៍មួយនេះ នៅវេលាម៉ោង ១០:៤៥នាទី (ម៉ោងសកល) ដោយមានជម្រៅ ១០គីឡូម៉ែត្រ។ ភ្លាមៗនេះ មិនមានរបាយការណ៍នៅឡើយទេ អំពីការប៉ះពាល់ដល់អាយុជីវិត ឬការខូចខាតហេដ្ឋារចនាសម្ព័ន្ធ។

គួរបញ្ជាក់ថា ប្រទេសហ្វីលីពីន ដែលស្ថិតនៅតាមបណ្តោយកងភ្លើងនៃមហាសមុទ្រប៉ាស៊ីហ្វិកដែលមានសកម្មភាពរញ្ជួយដី តែងតែជួបប្រទះនឹងគ្រោះរញ្ជួយដីកម្រិតខុសៗគ្នា។

នៅព្រឹកថ្ងៃអង្គារនេះដែរ បើយោងតាមទីភ្នាក់ងារស្ទាបស្ទង់ភូគព្ភសាស្ត្រអាមេរិក បានឲ្យដឹងថា ការរញ្ជួយកម្រិត ៥,៤រ៉ិចទ័រ បានកើតមាននៅកោះ Kyushu ភាគខាងត្បូងរបស់ប្រទេសជប៉ុន៕