ប្រទេសជប៉ុន នៅថ្ងៃអង្គារ (ទី២៥ ខែវិច្ឆិកា) នេះ បានប្រាប់ឲ្យដឹងថា ខ្លួនបានពង្រាយយន្តហោះភ្លាមៗ បន្ទាប់ពីបានប្រទះឃើញយានដ្រូនដែលសង្ស័យជារបស់ចិន នៅម្ដុំកោះមួយ ក្បែរកោះតៃវ៉ាន់ ដែលត្រូវបានទាញចូលទៅក្នុងជម្លោះការទូតរយៈពេល ១សប្តាហ៍ រវាងទីក្រុងតូក្យូ និងប៉េកាំង។

យានដ្រូននេះ ត្រូវបានប្រទះឃើញ នៅម្ដុំកោះ Yonaguni របស់ជប៉ុន ជាកោះមួយដែលទីក្រុងតូក្យូគ្រោងនឹងដាក់ពង្រាយមីស៊ីល ជាវិធានការដែលធ្វើឲ្យទីក្រុងប៉េកាំងខឹងសម្បា។

ក្រសួងការពារជាតិជប៉ុនបានឲ្យដឹងនៅលើបណ្ដាញសង្គម X ថា៖ «យើងបានបញ្ជាក់ថា យានដ្រូនដែលត្រូវជឿជាក់ថា ជារបស់ចិន បានហោះឆ្លងកាត់ រវាងកោះ Yonaguni និងកោះតៃវ៉ាន់ កាលពីថ្ងៃចន្ទ»។ ស្ថាប័ននេះបានបញ្ជាក់ថា កងកម្លាំងស្វ័យការពារដែនអាកាសរបស់ជប៉ុន ក្នុងតំបន់ «បានប្រញាប់ប្រញាល់បញ្ចេញយន្តហោះ» ដើម្បីជាការឆ្លើយតប។

គួរបញ្ជាក់ថា ទំនាក់ទំនងទីក្រុងប៉េកាំង និងតូក្យូ បានជួបនឹងភាពអាប់អួនៅក្នុងខែនេះ បន្ទាប់ពីមានការកត់សម្គាល់របស់នាយករដ្ឋមន្ត្រីជប៉ុន លោកស្រី Sanae Takaichi ដែលលើកឡើងថា ទីក្រុងតូក្យូអាចធ្វើអន្តរាគមន៍ផ្នែកយោធានៅក្នុងការវាយប្រហារណាមួយលើកោះតៃវ៉ាន់។

ជម្លោះបានឡើងកម្ដៅម្តងទៀត កាលពីថ្ងៃចន្ទ នៅពេលដែលចិនបានថ្កោលទោសការសម្រេចចិត្តរបស់ជប៉ុន ក្នុងការបន្តទៅមុខជាមួយនឹងគម្រោងដាក់ពង្រាយមីស៊ីល នៅលើកោះ Yonaguni បន្ទាប់ពីមានការចុះទៅពិនិត្យកោះនេះ ពីសំណាក់រដ្ឋមន្ត្រីការពារជាតិ លោក Shinjiro Koizumi៕