ព្យុះភ្លៀងដ៏ខ្លាំងក្លាមិនធ្លាប់មានក្នុងរយៈពេល៣០០ ឆ្នាំ បានវាយប្រហារភាគខាងត្បូងប្រទេសថៃ ដោយនាំមកនូវទឹកជំនន់កម្ពស់ជិត៣ម៉ែត្រ ដែលនៅក្នុងទីក្រុងមួយ បានកាត់ផ្តាច់ការចូលទៅកាន់មណ្ឌលសម្ភពដែលមានទារកទើបនឹងកើតចំនួន៣០ នាក់ នេះបើយោងតាមក្រុមបុគ្គលិក និងមន្ត្រី។

យោងតាមក្រសួងសុខាភិបាលសាធារណៈ ចំនួនអ្នកស្លាប់បានកើនឡើងដល់១៩នាក់នៅទូទាំងភាគខាងត្បូងប្រទេសថៃ ដែលភាគច្រើនបណ្តាលមកពីការឆក់ចរន្តអគ្គិសនី និងគ្រោះថ្នាក់ទាក់ទងនឹងទឹកជំនន់ ។

យោងតាមនាយកដ្ឋានធារាសាស្ត្រថៃ ភ្លៀងធ្លាក់ខ្លាំងបំផុតត្រូវបានគេឃើញនៅក្នុងទីក្រុង ហាតយ៉ៃ (Hat Yai city) ដែលជាមជ្ឈមណ្ឌលដឹកជញ្ជូន និងពាណិជ្ជកម្មដ៏សំខាន់មួយនៅក្នុងខេត្តសុងក្លា(Songkhla) ដែលបានកត់ត្រាភ្លៀងធ្លាក់ខ្លាំងបំផុតក្នុងរយៈពេល ៣០០ ឆ្នាំ។     

ក្រុមមន្ត្រីបានប្រាប់ទូរទស្សន៍ CNN ថា តួលេខនោះសំដៅទៅលើភាពកម្រនៃព្យុះភ្លៀងប្រភេទនេះ ដែលអាចកើតឡើងម្តងក្នុងរយៈពេល៣០០ឆ្នាំ។ 

អភិបាលខេត្តសុងក្លារបស់ថៃ ដែលរួមមានទីក្រុងហាតយ៉ៃ បានប្រកាសតំបន់ទាំងមូលជាតំបន់គ្រោះមហន្តរាយ និងបានបញ្ជាឱ្យជម្លៀសប្រជាជនជាបន្ទាន់ ខណៈភ្លៀងធ្លាក់ខ្លាំងជាបន្តបន្ទាប់បានធ្វើឱ្យស្រុកជាច្រើនធ្លាក់ចូលទៅក្នុងស្ថានភាពវិបត្តិ។ រដ្ឋាភិបាលបានបញ្ជាឲ្យបញ្ជូនគ្រប់ធនធានទាំងអស់ជួយសង្គ្រោះនៅទីក្រុង Hat Yai។

គិតត្រឹមថ្ងៃចន្ទដើមសប្ដាហ៍នេះ ខេត្តចំនួន៩នៅទូទាំងភាគខាងត្បូងប្រទេសថៃនៅតែលិចលង់ ដែលប៉ះពាល់ដល់មនុស្សជាង ១២៧.០០០ គ្រួសារ ។កន្លែងខ្លះមានភ្លៀងធ្លាក់កម្រិតជិត ៤០០ មីលីម៉ែត្រ ដែលកាន់តែធ្ងន់ធ្ងរដោយសារទឹកទន្លេហូរហៀរ និងទឹកជំនន់ដ៏គំហុក៕