យោងតាមការប្រកាសរបស់ការិយាល័យប្រធានាធិបតីបានឲ្យដឹងថា ក្មេងស្រីចំនួន ២៤ នាក់ដែលត្រូវបានចាប់ពង្រត់ពីសាលារៀនរដ្ឋាភិបាលនៅភាគពាយ័ព្យប្រទេសនីហ្សេរីយ៉ាកាលពីសប្តាហ៍មុនត្រូវបានដោះលែងវិញ។ ប្រធានាធិបតីនីហ្សេរីយ៉ា លោក Bola Tinubu កាលពីថ្ងៃអង្គារបានស្វាគមន៍ចំពោះការដោះលែងក្មេងស្រីទាំងនោះ ហើយបានអំពាវនាវដល់កងកម្លាំងសន្តិសុខឱ្យបង្កើនកិច្ចខិតខំប្រឹងប្រែងដើម្បីឲ្យមានការដោះលែងអ្នកផ្សេងទៀតដែលនៅតែជាប់ខ្លួននៅឡើយ។

លោក Tinubu និយាយថា «ខ្ញុំមានអារម្មណ៍ធូរស្រាលដែលក្មេងស្រី២៤នាក់ត្រូវបានដោះលែងមកវិញ។ ពេលនេះយើងត្រូវតែដាក់ជាបញ្ហាបន្ទាន់នៅក្នុងតំបន់ងាយរងគ្រោះ ដើម្បីបញ្ចៀសឧប្បត្តិហេតុចាប់ពង្រត់ដែលអាចកើតមានបន្ថែមទៀត។ រដ្ឋាភិបាលរបស់ខ្ញុំនឹងផ្តល់ជំនួយទាំងអស់ដែលត្រូវការដើម្បីសម្រេចបាននូវរឿងនេះ»។

ក្មេងស្រីជាច្រើននាក់ត្រូវបានចាប់ពង្រត់កាលពីថ្ងៃទី១៧ ខែវិច្ឆិកា នៅពេលក្រុមប្រដាប់អាវុធបានសម្រុកចូលសាលារៀនមួយកន្លែងនៅក្នុងរដ្ឋ Kebbi ភ្លាមៗបន្ទាប់ពីយោធាមួយក្រុមបានចាកចេញពីបរិវេណសាលារៀន។ ការចាប់ពង្រត់ទ្រង់ទ្រាយធំដើម្បីទាមទារប្រាក់លោះបានក្លាយជារឿងធម្មតានៅភាគខាងជើងប្រទេសនីហ្សេរីយ៉ា ជាកន្លែងដែលក្រុមជនអន្ធពាលប្រដាប់អាវុធកំណត់គោលដៅនៅសាលារៀន និងសហគមន៍ជនបទ។

នៅក្នុងការចាប់ពង្រត់ទ្រង់ទ្រាយធំកាលពីពេលថ្មីៗនេះ ក្រុមអ្នកវាយប្រហារបានឆ្មក់ចូលសាលារៀនកាតូលិកមួយកន្លែងកាលពីថ្ងៃសុក្រសប្តាហ៍មុន ដោយបានចាប់ពង្រត់ទាំងសិស្សនិងបុគ្គលិកជាង៣០០នាក់។ សិស្សចំនួន៥០នាក់បានរត់គេចខ្លួនកាលពីចុងសប្តាហ៍មុន ខណៈឪពុកម្តាយរបស់កុមារផ្សេងទៀតដែលត្រូវបានចាប់ពង្រត់បាននិយាយថា ពួកគេអស់សង្ឃឹមចំពោះការដោះលែងសិស្សដែលនៅសល់។