យោងតាមឯកសារមួយដែលចុះហត្ថលេខាដោយប្រធានាធិបតីរុស្ស៊ី លោក Vladimir Putin និងចេញផ្សាយកាលពីថ្ងៃអង្គារ (២៥ វិច្ឆិកា) បានបង្ហាញថា អាជ្ញាធររុស្ស៊ី ត្រូវតែបង្រួបបង្រួមភាសា និងអត្តសញ្ញាណជនជាតិរុស្ស៊ី នៅក្នុងផ្នែកខ្លះនៃអ៊ុយក្រែន ដែលបានបញ្ចូលជាឧបសម្ព័ន្ធទៅក្នុងប្រទេសរុស្ស៊ី ចាប់តាំងពីប្រតិបត្តិការយោធាពិសេសក្នុងឆ្នាំ២០២២ មក។

ឯកសារដែលមានចំណងជើងថា "យុទ្ធសាស្ត្រនៃគោលនយោបាយជាតិរបស់រុស្ស៊ី ក្នុងរយៈពេលរហូតដល់ឆ្នាំ២០៣៦" បានដាក់ចេញជាក្រឹត្យ ដែលចុះហត្ថលេខាដោយប្រធានាធិបតី។ ក្រឹត្យនេះអំពាវនាវឱ្យចាត់វិធានការដើម្បីធានាថា អត្រា ៩៥% នៃចំនួនប្រជាជនរបស់ប្រទេសនេះ កំណត់អត្តសញ្ញាណជាជនជាតិរុស្ស៊ី នៅត្រឹមឆ្នាំ២០៣៦។

គួរឱ្យដឹងថា រុស្ស៊ី និងអ៊ុយក្រែន មានទំនាក់ទំនងដ៏យូរលង់ តាំងពីមុនសម័យសូវៀតទៅទៀត ដែលមានន័យថា ជាប្រពៃណី ជនជាតិអ៊ុយក្រែនមួយចំនួនមានអារម្មណ៍អាណិតអាសូររុស្ស៊ី ហើយភាគច្រើននិយាយភាសាទាំងពីរ។ ប៉ុន្តែចាប់តាំងពីប្រតិបត្តិការយោធាពិសេសមក ទំនោរបែបនេះបានរលាយបាត់ ហើយការស្ទង់មតិបង្ហាញថា ការប្រើប្រាស់ភាសារុស្ស៊ី បានធ្លាក់ចុះគួរឱ្យកត់សម្គាល់។

លោក Putin បានបើកប្រតិបត្តិការយោធាពិសេសលើអ៊ុយក្រែន នៅខែកុម្ភៈ ឆ្នាំ២០២២ ដោយនិយាយថា គោលបំណងគឺដើម្បី "លុបបំបាត់យោធា និងលុបពួកណាហ្ស៊ីនិយម" ព្រមទាំងរំដោះអ្នកនិយាយភាសារុស្ស៊ីនៅភាគខាងកើត ចេញពីអ្វីដែលវិមានក្រឹមឡាំងហៅថា ការរើសអើងដោយឥតញញើត។ ក្នុងពេលត្រឹមតែ ៦ខែ តំបន់ Donetsk តំបន់ Luhansk តំបន់ Kherson និង Zaporizhzhia ត្រូវដាក់បញ្ចូលជាឧបសម្ព័ន្ធrbs’រុស្ស៊ី ទោះបីជាទីក្រុងមូស្គូ មិនមានការគ្រប់គ្រងយោធាពេញលេញលើតំបន់អ៊ុយក្រែនទាំងនោះក៏ដោយ៕