ប្រទេសចិន នៅថ្ងៃពុធ (២៦ វិច្ឆិកា) នេះបានព្រមានខ្លាំងៗថា ខ្លួននឹង "កម្ទេច" នូវរាល់ការប៉ុនប៉ងបរទេសណាមួយក្នុងការជ្រៀតជ្រែកលើកោះតៃវ៉ាន់ បន្ទាប់ពីប្រទេសជប៉ុន បានប្រកាសផែនការដាក់ពង្រាយមីស៊ីលនៅលើកោះមួយរបស់ខ្លួនដែលនៅជិតកោះស្វ័យគ្រប់គ្រប់តៃវ៉ាន់។

ឆ្លើយតបនឹងសំណួរស្តីពីគម្រោងដាក់ពង្រាយអាវុធនេះ លោក Peng Qingen អ្នកនាំពាក្យការិយាល័យកិច្ចការតៃវ៉ាន់របស់ប្រទេសចិន បានប្រាប់សន្និសីទសារព័ត៌មានជាប្រចាំមួយថា៖ ទីក្រុងប៉េកាំង មានឆន្ទៈយ៉ាងមុតមាំ ការប្ដេជ្ញាចិត្តយ៉ាងមោះមុត និងសមត្ថភាពដ៏រឹងមាំ ក្នុងការការពារអធិបតេយ្យភាពជាតិ និងបូរណភាពទឹកដីរបស់ខ្លួន។ លោកបន្តថា "ចិននឹងកម្ទេចរាល់ការជ្រៀតជ្រែករបស់បរទេស"។

លោក Peng ក៏បាននិយាយថា "ការដាក់ពង្រាយអាវុធរបស់ប្រទេសជប៉ុន នៅក្នុងតំបន់ដែលនៅជាប់នឹងតំបន់តៃវ៉ាន់ របស់ប្រទេសចិន គឺមានគ្រោះថ្នាក់ខ្លាំងណាស់ ដោយមានចេតនាបង្កើតភាពតានតឹងក្នុងតំបន់ និងបង្កឱ្យមានការប្រឈមផ្នែកយោធា"។

ទីក្រុងប៉េកាំង ចាត់ទុកកោះតៃវ៉ាន់ថាជាទឹកដីរបស់ខ្លួន ហើយមិនបានច្រានចោលការប្រើកម្លាំងដើម្បីគ្រប់គ្រងកោះនេះទេ។ រដ្ឋាភិបាលកោះនេះបានច្រានចោល ហើយនិយាយថា មានតែប្រជាជនកោះតៃវ៉ាន់ប៉ុណ្ណោះ ដែលអាចសម្រេចអនាគតពួកគេបាន៕