នគរបាលនូវែលហ្សេឡង់ បាននិយាយនៅថ្ងៃពុធ (២៦ វិច្ឆិកា) នេះថា សាកសពអ្នកឡើងភ្នំ ២នាក់ ក្នុងនោះមានម្នាក់មកពីសហរដ្ឋអាមេរិក ត្រូវបានរកឃើញ បន្ទាប់ពីជនរងគ្រោះទាំងពីរបានធ្លាក់ពីលើភ្នំដ៏ខ្ពស់បំផុតរបស់ប្រទេសនូវែលហ្សេឡង់ អំឡុងពេលប៉ុនប៉ងឡើងកំពូលភ្នំនេះ។

អាជ្ញាធរនិយាយថា អ្នកស្លាប់ទាំងពីរនាក់គឺជាបុរស ហើយពួកគេជាផ្នែកនៃក្រុមឡើងភ្នំមួយ ដែលមានគ្នា ៤នាក់ — ពោលគឺមគ្គុទ្ទេសក៍មានមូលដ្ឋាននៅនូវែលសេឡង់ ២នាក់ និងអតិថិជន ២នាក់ — ដែលឡើងភ្នំ Cook ឬហៅថាភ្នំ Aoraki កម្ពស់ ៣.៧២៤ម៉ែត្រ ក្រោយមក ពួកគេបានធ្លាក់ពីជួរភ្នំមួយទៅផ្នែកខាងលិចនៃភ្នំ កាលពីល្ងាចថ្ងៃចន្ទដើមសប្ដាហ៍នេះ។

អាជ្ញាធរបានទទួលដំណឹងនៅម៉ោងក្នុងស្រុកប្រហែល ១១:២០ នាទីយប់ថ្ងៃចន្ទ ហើយក្រុមស្វែងរកនិងជួយសង្គ្រោះ បានរកឃើញសមាជិក ២នាក់នៃក្រុមនោះដែលមិនរងរបួសទេ ខណៈឧទ្ធម្ភាគចក្រនគរបាល បន្តស្វែងរកពេញមួយយប់ រួចក៏រកឃើញសាកសពអ្នកឡើងភ្នំទាំងពីរនាក់។

ក្រុមប្រឹក្សាសុវត្ថិភាពភ្នំនូវែលហ្សេឡង់ បាននិយាយនៅក្នុងសេចក្តីថ្លែងការណ៍មួយថា បុរសម្នាក់ក្នុងចំណោមអ្នកស្លាប់គឺជាមគ្គុទ្ទេសក៍ឡើងភ្នំ ចំណែកម្នាក់ទៀតគឺជាអតិថិជនរបស់គេ។ គួរឱ្យដឹងថា ក្នុងមួយសតវត្សរ៍កន្លងមកនេះ អ្នកឡើងភ្នំរាប់សិបនាក់បានស្លាប់នៅភ្នំ Cook ជាទីដែលការធ្លាក់ផ្ទាំងថ្មជារឿងធម្មតា ហើយការធ្លាក់សំណុំព្រិលធំៗ ជាញឹកញាប់ក៏តែងកើតឡើងនៅរយៈកម្ពស់ខ្ពស់៕