មន្ត្រីជាន់ខ្ពស់មួយរូបបាននិយាយនៅថ្ងៃពុធ២៦វិច្ឆិកានេះ ថាចំនួនអ្នកស្លាប់ដោយសារទឹកជំនន់នៅក្នុងប្រទេសថៃ ភាគខាងត្បូង បានកើនឡើងដល់ ៣៣នាក់ ។ អ្នកនាំពាក្យរដ្ឋាភិបាល លោក Siripong Angkasakulkiat បាននិយាយថា មូលហេតុនៃការស្លាប់រួមទាំង បំណាក់ដី និងឆក់ខ្សែភ្លើង ។   

លោកនាយករដ្ឋមន្ត្រីថៃ Anutin Charnvirakul បានប្រកាសដាក់ខេត្ត Songkhla ក្នុងគ្រាអាសន្ន កាលពីថ្ងៃអង្គារសប្ដាហ៍នេះ ខណៈទឹកជំនន់ធ្ងន់ធ្ងរបន្តវាយប្រហារភាគខាងត្បូង។  

ការប្រកាសនេះ កើតឡើងខណៈរដ្ឋាភិបាលបានបង្កើតមជ្ឈមណ្ឌលបញ្ជាការដើម្បីសម្របសម្រួលប្រតិបត្តិការជួយសង្គ្រោះឆ្លើយតបទៅនឹងភ្លៀងធ្លាក់ និងទឹកជនន់ធ្ងន់ធ្ងរមិនធ្លាប់មាន ដែលបានបណ្ដាលឲ្យខូចខាតទ្រព្យសម្បត្តិ យ៉ាងទូលំទូលាយ និងគំរាមកំហែងយ៉ាងខ្លាំងដល់សុវត្ថិភាពសាធារណៈ។

ព្យុះភ្លៀងដ៏ខ្លាំងក្លាមិនធ្លាប់មានក្នុងរយៈពេល៣០០ឆ្នាំ បានវាយប្រហារភាគខាងត្បូងប្រទេសថៃ ដោយនាំមកនូវទឹកជំនន់កម្ពស់ជិត៣ម៉ែត្រ ដែលនៅក្នុងទីក្រុងមួយ បានកាត់ផ្តាច់ការចូលទៅកាន់មណ្ឌលសម្ភពដែលមានទារកទើបនឹងកើតចំនួន៣០ នាក់ នេះបើយោងតាមក្រុមបុគ្គលិក និងមន្ត្រី។

យោងតាមនាយកដ្ឋានធារាសាស្ត្រថៃ ភ្លៀងធ្លាក់ខ្លាំងបំផុតត្រូវបានគេឃើញនៅក្នុងទីក្រុង ហាតយ៉ៃ (Hat Yai city) ដែលជាមជ្ឈមណ្ឌលដឹកជញ្ជូន និងពាណិជ្ជកម្មដ៏សំខាន់មួយនៅក្នុងខេត្តសុងក្លា(Songkhla) ដែលបានកត់ត្រាភ្លៀងធ្លាក់ខ្លាំងបំផុតក្នុងរយៈពេល ៣០០ ឆ្នាំ។    

អភិបាលខេត្តសុងក្លារបស់ថៃ ដែលរួមមានទីក្រុងហាតយ៉ៃ បានប្រកាសតំបន់ទាំងមូលជាតំបន់គ្រោះមហន្តរាយ និងបានបញ្ជាឱ្យជម្លៀសប្រជាជនជាបន្ទាន់ ខណៈភ្លៀងធ្លាក់ខ្លាំងជាបន្តបន្ទាប់បានធ្វើឱ្យស្រុកជាច្រើនធ្លាក់ចូលទៅក្នុងស្ថានភាពវិបត្តិ។ រដ្ឋាភិបាលបានបញ្ជាឲ្យបញ្ជូនគ្រប់ធនធានទាំងអស់ជួយសង្គ្រោះនៅទីក្រុង Hat Yai។ 

គិតត្រឹមថ្ងៃចន្ទដើមសប្ដាហ៍នេះ ខេត្តចំនួន៩នៅទូទាំងភាគខាងត្បូងប្រទេសថៃនៅតែលិចលង់ ដែលប៉ះពាល់ដល់មនុស្សជាង ១២៧.០០០ គ្រួសារ ។កន្លែងខ្លះមានភ្លៀងធ្លាក់កម្រិតជិត ៤០០ មីលីម៉ែត្រ ដែលកាន់តែធ្ងន់ធ្ងរដោយសារទឹកទន្លេហូរហៀរ និងទឹកជំនន់ដ៏គំហុក៕