បេសកជនរបស់លោក ដូណាល់ ត្រាំ ទទួលបន្ទុកកិច្ចការអាហ្រិ្វក លោក Massad Boulos បាននិយាយកាលពីថ្ងៃអង្គារថា ពុំមានភាគីជម្លោះណាមួយនៅក្នុងប្រទេសស៊ូដង់ បានទទួលយកសំណើបទឈប់បាញ់ចុងក្រោយបំផុតនោះទេ ដោយជំរុញឲ្យភាគីទាំងពីរយល់ព្រមចំពោះបទឈប់បាញ់ដែលទីក្រុងវ៉ាស៊ីនតោន បានស្នើឡើងក្នុងនាមអ្នកសម្របសម្រួលដោយគ្មានបុរេលក្ខខណ្ឌ។

លោកបានប្រាប់អ្នកយកព័ត៌មាននៅរដ្ឋធានីអាប៊ុយដាប៊ីថា៖«យើងសូមអំពាវនាវដល់ភាគីទាំងពីរ ឲ្យទទួលយកបទឈប់បាញ់មនុស្សធម៌ ដូចដែលបានស្នើឡើងដោយគ្មានលក្ខខណ្ឌជាមុន»។

លោក Boulos បាននិយាយថា សហរដ្ឋអាមេរិកបានបង្ហាញកងទ័ពស៊ូដង់ដែលកំពុងធ្វើសង្គ្រាម និងកងកម្លាំងគាំទ្ររហ័ស (RSF) នូវឯកសារដ៏រឹងមាំសម្រាប់ផែនការសន្តិភាព ប៉ុន្តែភាគីទាំងពីរ មិនបានទទួលយកវាទេ។

លោក ត្រាំ បាននិយាយកាលពីសប្តាហ៍មុនថា លោកនឹងធ្វើអន្តរាគមន៍ ដើម្បីបញ្ឈប់ជម្លោះដ៏បំផ្លិចបំផ្លាញ ដែលបានផ្ទុះឡើងនៅក្នុងខែមេសា ឆ្នាំ២០២៣ ហើយបានធ្វើឲ្យទុរ្ភិក្សរាលដាល និងការសម្លាប់ជនជាតិភាគតិចនៅទូទាំងប្រទេសនេះ និងគំរាមកំហែងដល់ការបែកបាក់ ជាលើកទី២ ក្នុងប្រវត្តិសាស្ត្ររបស់ខ្លួន។

កិច្ចខិតខំប្រឹងប្រែងពីមុនដែលដឹកនាំដោយសហរដ្ឋអាមេរិក អារ៉ាប៊ីសាអ៊ូឌីត អេហ្ស៊ីប និងអារ៉ាប់រួម បានបរាជ័យក្នុងការទទួលបានលទ្ធផលផ្លែផ្កា។ ក្រុមនេះ បានដាក់សំណើមួយទៅកាន់កងកម្លាំងទាំងពីរ នៅដើមខែវិច្ឆិកា។

លោក Boulos ទីប្រឹក្សារបស់ប្រធានាធិបតីអាមេរិកទទួលបន្ទុកកិច្ចការអាហ្វ្រិក និងអារ៉ាប់ បាននិយាយថា ក្រុមជម្លោះទាំងពីររបស់ស៊ូដង់ បានស្វាគមន៍ផែនការរបស់សហរដ្ឋអាមេរិក ប៉ុន្តែគ្មានក្រុមណាមួយបានទទួលយកឯកសារនោះ ជាផ្លូវការទេ៕